مضبوط اَتے مستحکم معیشت کیتے نجی شعبے کوں سہولتاں ݙیوݨ ضروری اے، وزیر خزانہ محمد اورنگزیب

اسلام آباد۔ 26 نومبر (اے پی پی) وفاقی وزیر خزانہ و محصولات سینیٹر محمد اورنگزیب آکھیے جو مضبوط اَتے مستحکم معیشت کیتے نجی شعبے کوں سہولتاں ݙیوݨ ضروری اے، حکومتی اقدامات دے نتیجے اچ معیشت مستحکم تھئی ڳئی اے اَتے اہم اقتصادی اشاریں توں ایں دی جھلک وی ݙٹھی ویندی پئی اے۔ ٹیکس دی بنیاد اچ وسعت، لیکجز دا خاتمہ اَتے ٹیکس نظام اچ شفافیت اساݙا مقصد اے۔ سرکاری ملکیت آلے اداریں اچ گورننس دی بہتری اَتے نجکاری دا عمل مرحلہ وار اڳوں ودھایا ویندا پئے۔پاکستان بزنس کونسل دے زیر اہتمام منعقدہ تقریب اچ ”پاکستان دا بہتر تھیندا ہویا منظرنامہ“ دے موضوع تے خطاب کریندے وزیر خزانہ آکھیا جو حکومت نجی شعبے دی قیادت اچ برآمدات تے مبنی پائیدار اقتصادی ترقی و ودھارے کیتے ٹھوس اقدامات کریندی پئی اے۔ وزیراعظم مختلف شعبیں دی ترقی کیتے نجی شعبے دی قیادت اچ گروپ بݨائن جنہاں دیاں تجویزاں اَتے سفارشات تے موثر انداز اچ عملدرآمد تھیندا پئے۔انہاں آکھیا جو پاکستان بزنس کونسل ولوں برآمدی ترقیاتی سرچارج اچ گھٹکی دی تجویز سامݨے آئی ہئی جیں تے وزیراعظم ایں کوں ختم کر ݙتے۔ نجی شعبہ ملک کوں اڳوں گھن تے ویندا پئے۔ عالمی منظرنامے اچ وی نجی شعبے دا مرکزی کردار رہیے۔ ابھردی ہوئی معیشتاں اچ نجی شعبے جیہڑا کردار ادا کیتے ایں دے نتیجے اچ انہاں ملکاں کوں اقتصادی جھٹکیں نال نبڑݨ اچ مدد ملی اے۔وزیر خزانہ آکھیا جو حکومت ولوں معیشت دی بہتری کیتے اقدامات دا سلسلہ جاری اے، حکومتی اقدامات دے نتیجے اچ اساݙی معیشت مستحکم تھئی ڳئی اے اَتے اہم اقتصادی اشاریں توں ایں دی عکاسی وی تھیندی پئی اے۔ انہاں آکھیا جو اندرلے مسئلیں اَتے ٻاہرلے معاشی جھٹکیں توں بچݨ کیتے اساکوں بفرز کوں مضبوط بݨاوݨا ہوسی۔انہاں ݙسیا جو جاری مالی سال دے پہلے چار مہینے اچ سیمنٹ دے شعبے اچ 16 فیصد، کھاداں 9 فیصد، پٹرولیم 4 فیصد، آٹوموبائل 31 فیصد، موبائل فونز 26 فیصد اَتے وݙیاں صنعتاں دی پیداوار دے شعبے اچ 4 فیصد توں ودھ ودھارا تھئے۔ اوورسیز انویسٹمنٹ چیمبرز آف کامرس دے اڄوکےسروے اچ 73 فیصد رائے ݙیوݨ آلیاں پاکستان کوں براہ راست ٻاہرلی سرمایہ کاری کیتے موزوں ملک قرار ݙتے، ݙو سال پہلے اے شرح 61 فیصد ہئی۔ سعودی عرب، یو اے ای اَتے ترکی سودھے کئی ملکاں دے سرمایہ کار اَتے کمپنیاں ملک اچ سرمایہ کاری کیتے آندیاں پئن۔وزیر خزانہ آکھیا جو ایف بی آر اچ لوکاں، پروسیس اَتے ٹیکنالوجی دی بنیاد تے اصلاحات دا عمل جاری اے۔ ٹیکس دی بنیاد اچ وسعت، لیکجز دا خاتمہ اَتے ٹیکس نظام اچ شفافیت اساݙا مقصد اے کیوں جو ٹیکس نظام اچ شفافیت نال ادارے مضبوط تھیندن۔ انہاں ݙسیا جو پالیسی سازی ایف بی آر توں وزارت خزانہ کوں منتقل کر ݙتی ڳئی اے۔وزیر خزانہ آکھیا جو سرکاری ملکیت آلے اداریں اچ گورننس دی بہتری اَتے نجکاری دا عمل مرحلہ وار اڳوں ودھایا ویندا پئے۔ ہݨ تئیں 20 وزارتاں اَتے 301 محکمیں دا جائزہ ڳھدا ڳئے، 9 وزارتاں اَتے 78 محکمیں تے کم جاری اے۔ 30 ستمبر تئیں 54 ہزار خالی آسامیاں کوں ختم کر ݙتا ڳئے، ایں دا سالانہ اثر 56 ارب روپے اے۔ نارکوٹکس کنٹرول کوں وزارت داخلہ اچ رلا ݙتا ڳئے، کشمیر اَتے ریاستاں و سرحدی امور کوں رلا ݙتا ڳئے، ہوابازی کوں وزارت دفاع اچ رلا ݙتا ڳئے۔ کیڈ، پی ڈبلیو ڈی اَتے یوٹیلیٹی کارپوریشن کوں بند کر ݙتا ڳئے، پاسکو کوں ختم کرݨ دا عمل جاری اے۔ ایں سارے عمل اچ متاثرہ ملازمین کوں پیکیجز، ضروری قانونی اَتے ادائیگی دی ذمہ واریاں کوں پورا کیتا ویندا پئے۔وزیر خزانہ آکھیا جو کیش لیس معیشت کوں اڳوں ودھایا ویندا پئے اَتے ایں اچ بینکس اَتے ادائیگیاں دے پلیٹ فارمز مرکزی کردار ادا کریندے پئن۔ حکومت آندے مالی اَتے کیلنڈر سال دے اختتام تئیں ڈیجیٹل پاکستان اَتے کیش لیس معیشت کیتے اہداف مقرر کیتن۔