وفاقی وزیر قومی غذائی تحفظ و تحقیق رانا تنویر حسین دی قیادت اچ ملک دے پہلے عوامی اَتے نجی شعبے دے جینیات دے سانجھے منصوبے دا آغاز

اسلام آباد۔ 26 نومبر (اے پی پی) وفاقی وزیر قومی غذائی تحفظ و تحقیق رانا تنویر حسین پاکستان دیاں سائنسی اَتے تکنیکی صلاحیتاں کوں مزید اڳوں ودھاوݨ کیتے ہک تاریخی قدم چیندے ملک دے پہلے عوامی اَتے نجی شعبے دے جینیات دے سانجھے منصوبے دا آغاز کیتے۔ اے انقلابی اقدام ملک دے تحقیقاتی اداریں کوں مضبوط کرݨ، زرعی جدت کوں ودھارا ݙیوݨ اَتے مقامی جینیاتی تحقیق اَتے تشخیص دے ذریعے صحت دے شعبے کوں بہتر بݨاوݨ کیتے ہے۔اے منصوبہ نیشنل انسٹی ٹیوٹ فار جینیات اینڈ ایڈوانسڈ بائیوٹیکنالوجی (این آئی جی اے بی)، پی اے آر سی ایگرو ٹیک کمپنی (پی اے ٹی سی او) جیڑھی پاکستان ایگریکلچر ریسرچ کونسل (پی اے آر سی) دے تحت اے اَتے بلیزون ڈائیگنوسٹکس وچال تعاون تے مبنی اے۔ افتتاحی تقریب این آئی جی اے بی، این اے آر سی اسلام آباد اچ تھئی، جیں اچ قومی اَتے بین الاقوامی ماہرین دے ہک ممتاز گروہ شرکت کیتی۔تقریب اچ چیئرمین پی اے آر سی ڈاکٹر سید مرتضی حسن اندرابی، چیئرمین پاک چائنا بزنس فورم لیفٹیننٹ جنرل (ر) عبدالقیوم، ڈائریکٹر جنرل این اے آر سی ڈاکٹر خالد محمود، کمانڈنٹ ایس آئی بی جی اے بریگیڈئر علی رضا، ڈائریکٹر این آئی جی اے بی ڈاکٹر شوکت علی، سی ای او پی اے ٹی سی او ڈاکٹر تاج نصیب خان اَتے ٻئے سینئر حکام، محققین اَتے سٹیک ہولڈرز شرکت کیتی۔ ایں تقریب اچ چینی محققین دا ہک وفد وی شامل تھیا جیں ایں منصوبے دی کامیابی کیتے مکمل حمایت دا اعلان کیتا۔وزارت قومی غذائی تحفظ و تحقیق دے وفاقی وزیر رانا تنویر حسین تقریب نال خطاب کریندے آکھیا جو اے سانجھا منصوبہ پاکستان دی غذائی تحفظ کوں یقینی بݨاوݨ اَتے قومی تحقیقاتی اداریں کوں مضبوط کرݨ اچ ہک اہم سنگ میل اے۔ وفاقی وزیر آکھیا جو اے منصوبہ پاکستان دے سائنسی منظرنامے کوں بدلݨ دے اساݙے عزم دا اظہار اے۔ مقامی جینیاتی صلاحیتاں دی ترقی دے ذریعے اساں اپݨے محققین، کساناں اَتے صحت دے ماہرین کوں جدید ایجادات کیتے موثر اوزار ݙیندے پیوں ۔ اے منصوبہ نہ صرف اساکوں جدید تحقیق اَتے تشخیص اچ خود انحصار بݨاوݨ اچ مدد ݙیسی بلکہ غیر ملکی جینیاتی خدمات تے انحصار گھٹ کر تے ملک دی معاشی ترقی اچ وی حصہ پیسی۔اے منصوبہ زرعی تحقیق اَتے کلینیکل تشخیص ݙوہیں کیتے مقامی ڈی این اے سیکوینسنگ دیاں خدمات ݙیسی جیں نال پاکستان دا غیر ملکی خدمات تے انحصار خاصا گھٹ تھی ویسی۔ ایں نال غیر ملکی زرمبادلہ دی بچت اچ مدد مِلسی اَتے سائنسی ترقی اَتے نویں ایجاد کوں ودھارا مِلسی۔ اے اقدام وزیراعظم محمد شہباز شریف اَتے حکومت دے وݙے وژن موجب اے جیڑھے جدید ٹیکنالوجیز دے ذریعے شہریاں دیاں زندگیاں کوں بہتر بݨاوݨ اَتے لمبے ویلھے دی غذائی تحفظ کوں یقینی بݨاوݨ دی کوشش کریندے پئن۔وفاقی وزیر مزید آکھیا جو ایں منصوبے دی کامیابی پاکستان دی قومی تحقیقاتی صلاحیت کوں ودھارا ݙیسی، جدید جینیاتی ٹیکنالوجیز دی کمرشلائزیشن کوں ودھارا ݙیسی اَتے بائیوٹیکنالوجی نال متعلق ترقی کیتے نویں رستے کھولیسی۔ مقامی سطح تے محققین کوں انقلابی تحقیق کرݨ دے موقع ݙے تے، اے تعاون پاکستان کوں جینیات دی تحقیق اَتے بائیوٹیکنالوجی اچ ہک علاقائی قائد دے طور تے سامݨے گھن آسی۔اپݨے خطاب اچ چیئرمین پی اے آر سی ڈاکٹر سید مرتضی حسن اندرابی وی ایں منصوبے دی تعریف کیتی اَتے این آئی جی اے بی اَتے پی اے ٹی سی او دے کردار دی تعریف کیتی جنہاں ایں وژن کوں حقیقت اچ بدلݨ اچ اہم کردار ادا کیتا۔ انہاں آکھیا جو اے منصوبہ پاکستان دے بائیوٹیکنالوجی دے شعبے اچ ہک نویں دور دی بنیاد رکھیسی جیڑھا نہ صرف زرعی پیداوار بلکہ عوامی صحت اچ وی فائدہ مند ثابت تھیسی۔ اے منصوبہ وفاقی وزیر رانا تنویر حسین دی قیادت اچ پاکستان دیاں سائنسی اَتے تکنیکی صلاحیتاں کوں اڳوں ودھاوݨ دے پاسے ہک اہم قدم اے۔ایں عوامی و نجی شعبے دے تعاون دا آغاز پاکستان دے بائیوٹیکنالوجی دے شعبے کیتے ہک اہم پیشرفت اے، جیڑھا ملک کوں مستقبل دے چیلنجز دا مقابلہ کرݨ اَتے عالمی سائنسی کمیونٹی اچ جدید، مقامی حل ݙیوݨ دی پوزیشن اچ رکھیسی۔