جدید تجارتی مرکز سرمایہ کاری دے ودھارے اچ مرکزی کردار ادا کریندن، وفاقی وزیر قیصر احمد شیخ

اسلام آباد۔ 26 نومبر(اے پی پی) وفاقی وزیر بورڈ آف انویسٹمنٹ قیصر احمد شیخ آکھیے جو جدید تجارتی مرکز سرمایہ کاری دے ودھارے اچ مرکزی کردار ادا کریندن اَتے ایجھا منصوبہ پاکستان دی ریٹیل انڈسٹری کوں جدید خطوط تے استوار کرݨ اچ مددگار ثابت تھیسن۔ واہ کینٹ اچ جدید طرز تے بݨوائے ڳئے شاپنگ مال دا افتتاح کیتا۔ افتتاحی تقریب اچ تاجراں، صنعت کاراں، مقامی قیادت اَتے ریئل اسٹیٹ سیکٹر نال وابستہ شخصیات وݙی تعداد شرکت کیتی۔وفاقی وزیر تقریب نال خطاب کریندے آکھیا جو حکومت سرمایہ کاری دوست ماحول دی بحالی کوں پہلی ترجیح ݙیندی پئی اے۔ انہاں آکھیا جو معیاری انفراسٹرکچر معاشی سرگرمیاں اچ تکھا پن اَتے سرمایہ کاراں دے اعتماد اچ ودھارے دا سبب بݨدے۔ بورڈ آف انویسٹمنٹ کاروباری ماحول کوں سوکھا بݨاوݨ، قوانین اچ اصلاحات اَتے سرمایہ کاراں کوں سہولتاں ݙیوݨ کیتے بھرپور اقدامات کریندا پئے۔قیصر احمد شیخ آکھیا جو اسلام آباد اچ بزنس فسیلیٹیشن سینٹر قائم کیتا ڳئے جتھاں سرمایہ کاراں کوں ساریاں سرکاری سہولتاں ہکی جاہ تے مِلسن۔ کاروباری اجازت نامیں دے حصول اچ خاصی بہتری اَتے تکھا پن آئے، آسان کاروبار ایکٹ بِل قومی اسمبلی توں منظور کروا ڳھدا ڳئے تاں جو کاروباری طبقے کوں مزید سہولتاں ݙتیاں ونڄ سڳن، بزنس کمیونٹی تے 80 فیصد غیر ضروری پابندیاں ختم کر ݙتیاں ڳن۔وفاقی وزیر آکھیا جو ملک اچ ریئل اسٹیٹ اَتے کنسٹرکشن سیکٹر کیتے نویں موقع بݨدے پئن جیڑھے معیشت کوں مضبوط بنیاداں ݙیسن۔ انہاں مزید آکھیا جو پرائیویٹ سیکٹر دی شمولیت ترقی یافتہ معیشت دی بنیاد اے اَتے حکومت کاروباری طبقے دے مسئلیں کوں ترجیحی بنیاداں تے حل کریندی پئی اے۔ایں موقع تے انہاں سابقہ حکومت تے تنقید کریندے آکھیا جو پی ٹی آئی دے دور اچ طاقتور طبقے کوں ارباں روپے دے قرضے ݙتے ڳئن جݙاں جو موجودہ حکومت حقیقی سرمایہ کاراں اَتے کاروباری طبقے کوں سہولت ݙیوݨ تے کم کریندی پئی اے۔قیصر احمد شیخ فیلڈ مارشل سید عاصم منیر دی قیادت دی تعریف کریندے آکھیا جو انہاں جنگ اچ اپݨے توں ݙاہ گنا وݙے ملک کوں شکست ݙے تے تاریخ رقم کیتی۔ وفاقی وزیر ایں عزم دا اعادہ کیتا جو بورڈ آف انویسٹمنٹ ملک اچ سرمایہ کاری دے ودھارے، کاروباری آسانی اَتے سرمایہ کاراں دے اعتماد اچ ودھارے کیتے اپݨے اقدامات جاری رکھیسی