پاکستان اَتے بحرین وچال ݙو پاسے تجارت کوں ترائے سالاں دے اندر1 بلین امریکی ڈالر تئیں گھن آیا ویسی، وزیراعظم محمد شہباز شریف دی بحرین دے ولی عہد، بحرینی افواج دے نائب سپریم کمانڈر اَتے وزیراعظم شہزادہ سلمان بن حمد الخلیفہ نال ملاقات اچ ڳالھ مہاڑ

منامہ۔ 26 نومبر (اے پی پی) وزیراعظم محمد شہباز شریف بحرینی سرمایہ کاراں کوں غذائی تحفظ، آئی ٹی، تعمیرات، کان کنی و معدنیات، صحت، قابل تجدید توانائی اَتے سیاحت سودھے مختلف شعبیں اچ سرمایہ کاری دی دعوت ݙیندے آکھیے جو ݙو پاسے تجارت دا حجم 550 ملین امریکی ڈالر توں ودھا تے ترائے سالاں دے اندر 1 ارب امریکی ڈالر تئیں ودھایا ویسی۔اے ڳالھ انہاں منامہ اچ بحرین دے ولی عہد، بحرینی افواج دے نائب سپریم کمانڈر اَتے وزیراعظم شہزادہ سلمان بن حمد الخلیفہ نال ملاقات اچ ڳالھ مہاڑ کریندے آکھی ۔ وزیراعظم محمد شہباز شریف ملاقات کیتے منامہ اچ قصر القضیبیہ پڄے تاں انہاں کوں شاندار گارڈ آف آنر پیش کیتا ڳیا۔ وزیراعظم پرتپاک استقبال تے شہزادہ سلمان بن حمد الخلیفہ دا شکریہ ادا کیتا اَتے ݙو پاسے تعلقات کوں مضبوط بݨاوݨ اچ بحرین دی قیادت دے کردار دی تعریف کیتی ۔ وزیراعظم بحرین کوں اقوام متحدہ دی سلامتی کونسل دی 2 سالہ مدت (2026-2027) کیتے غیر مستقل رکنیت حاصل کرݨ تے مبارخ ݙتی اَتے ایں دورانیے اچ آپت اچ تعاون مزید مضبوط کرݨ کیتے پاکستان دے عزم دا اظہار کیتا۔وزیر اعظم دفتر دے میڈیا ونگ توں جاری بیان موجب ملاقات اچ اقتصادی تعاون ڳالھ مہاڑ دا مرکز رہیا۔ وزیر اعظم ݙو پاسے تجارت کوں ودھاوݨ دے امکانات کوں نمایاں کیتا جیڑھا ایں ویلھے 550 ملین امریکی ڈالر توں ودھ اے۔ وزیراعظم آکھیا جو ایں ہدف کوں پاکستان-جی سی سی فری ٹریڈ ایگریمنٹ جیڑھا جو اپݨے آخری مرحلیں اچ اے اَتے اڄوکے ویزا دیاں شرطاں اچ نرمی جیھے اقدامات دے ذریعے حاصل کیتا ویسی۔انہاں بحرینی سرمایہ کاراں کوں فوڈ سکیورٹی، آئی ٹی، تعمیرات، کان کنی اَتے معدنیات، صحت، قابل تجدید توانائی اَتے سیاحت اچ موقع ڳولݨ دی دعوت ݙتی۔ انہاں کراچی/گوادر اَتے خلیفہ بن سلمان پورٹ وچال بندرگاہ توں بندرگاہ تئیں رابطے ودھاوݨ دی تجویز وی ݙتی۔وزیراعظم 150,000 توں ودھ پاکستانی کمیونٹی کیتے بحرین دی حمایت کوں منیا اَتے مزید ہنر مند افرادی قوت ݙیوݨ کیتے پاکستان دے عزم دی تصدیق کیتی۔ انہاں اعلیٰ تعلیم، تکنیکی تربیت اَتے ڈیجیٹل گورننس اچ مزید تعاون دا خیرمقدم کیتا۔ایں توں انڄ وزیراعظم اسلام آباد اچ کنگ حمد یونیورسٹی دی تعمیر اَتے پاکستانی شہریاں دی رہائی اَتے وطن واپسی اچ سہولت ݙیوݨ تے بحرین دا شکریہ ادا کیتا۔ ملاقات اچ دفاعی اَتے سکیورٹی تعاون تے وی ڳالھ مہاڑ کیتی ڳئی۔ فریقین تربیت، سائبر سکیورٹی، دفاعی پیداوار اَتے معلومات دے وٹاندرے اچ تعاون کوں مزید ودھاوݨ تے اتفاق کیتا۔ݙوہیں رہنماواں غزہ دی اڄوکی پیشرفت تے ڳالھ مہاڑ کریندے اتفاق کیتا جو غزہ دے عوام کیتے امن و استحکام دا قیام ٻہوں چنڳاں اے جیڑھے کئی ݙہاکیں توں مصیبتاں دا شکار ہن اَتے جیں دا غزہ دے عوام لمبے ویلھے توں انتظار کریندے پئن۔ ملاقات ایں اعتماد نال مُکی جو ڳالھ مہاڑ دے ٹھوس نتیجے نکلݨ اَتے سٹریٹجک، اقتصادی، سکیورٹی اَتے عوام توں عوام دے وچال تعلقات کوں مزید اُچا کیتا ویسی