موجودہ جیو سٹریٹجک ماحول اچ مضبوط قومی دفاع، قومی سلامتی دا بنیادی ستون اے، جنرل ساحر شمشاد مرزا

راولپنڈی۔ 26 نومبر(اے پی پی)سبکدوش تھیوݨ آلے چیئرمین جوائنٹ چیفس آف سٹاف کمیٹی جنرل ساحر شمشاد مرزا زور ݙتے جو موجودہ جیو سٹریٹجک ماحول اچ مضبوط قومی دفاع، قومی سلامتی دا بنیادی ستون اے۔ ٻدھ کوں پاک فوج دے شعبہ تعلقات عامہ (آئی ایس پی آر) ولوں جاری بیان موجب، جوائنٹ سٹاف ہیڈکوارٹرز اچ ہک خصوصی تقریب تھئی جیںدے اچ سبکدوش تھیوݨ آلے چیئرمین جوائنٹ چیفس آف سٹاف کمیٹی جنرل ساحر شمشاد مرزا کوں انہاں دی 40 سالہ شاندار عسکری خدمات دے اعتراف اچ خراج تحسین پیش کیتا ڳیا۔ تقریب اچ سابق چیئرمین جوائنٹ چیفس آف سٹاف کمیٹی اَتے تریے مسلح افواج دے سینئر عسکری افسراں شرکت کیتی۔ اپݨے خطاب اچ سبکدوش تھیوݨ آلے چیئرمین اللہ تعالیٰ دا شکر ادا کیتا جو اوں انہاں کوں اپݨے فرائض کوں بھرپور محنت، پیشہ وارانہ مہارت اَتے بے لوث جذبے نال ادا کرݨ دی توفیق ݙتی۔ انہاں مادر وطن دے دفاع اچ مسلح افواج دیاں لازوال قربانیاں کوں خراجِ تحسین پیش کیتا اَتے مسلح افواج دے شہیداں اَتے انہاں دے خانداناں کوں خراجِ عقیدت پیش کیتا۔ انہاں زور ݙتا جو موجودہ جیو سٹریٹجک ماحول اچ مضبوط قومی دفاع، قومی سلامتی دا بنیادی ستون اے۔ انہاں یقین دہانی کرائی جو قوم دا دفاع ناقابلِ تسخیر اے اَتے اساݙے بہادر افسر اَتے جوان اوکوں مزید مضبوط بݨاوݨ کیتے ہمیشہ تیار کھڑن۔ ایں توں پہلے جݙاں او جوائنٹ سٹاف ہیڈکوارٹرز پڄے تاں تریے مسلح افواج دے ہک چاق و چوبند دستے انہاں کوں “گارڈ آف آنر” پیش کیتا۔