اساݙے آسے پاسے دی دنیا ہک ناقابل تصور رفتار نال بدَلدی پئی اے، اِنہاں حالات اچ ساݙی مسلح افواج کوں زیادہ ہم آہنگی، سانجھے تعاون اَتے یکسو مقصد نال تیار رہݨا ہوسی، جنرل ساحر شمشاد مرزا

اسلام آباد۔ 27 نومبر (اے پی پی) سبکدوش تھیوݨ آلے چیئرمین جوائنٹ چیفس آف اسٹاف کمیٹی جنرل ساحر شمشاد مرزا، نشان امتیاز، نشان امتیاز (ملٹری) آکھیے جو اساݙے آسے پاسے دی دنیا ہک ناقابل تصور رفتار نال بدَلدی پئی اے، اِنہاں حالات اچ ساݙی مسلح افواج کوں زیادہ ہم آہنگی، سانجھے تعاون اَتے یکسو مقصد نال تیار رہݨا ہوسی۔ پاک فوج دے شعبہ تعلقات عامہ (آئی ایس پی آر) موجب ، انہاں اے ڳالھ آپݨے اعزاز اچ منعقدہ جوائنٹ اسٹاف ہیڈکوارٹر اچ الوادعی تقریب نال خطاب کریندے آکھی ۔ جنرل ساحر شمشاد مرزا آکھیا جو اساݙے آسے پاسے دی دنیا ہک ناقابل تصور رفتار نال بدَلدی پئی اے ، ایں تبدیلی نال اساݙیاں اندرلیاں تے ٻاہرلیاں آزمائشاں تے گھاٹے اثرات پوندے پئن، اے اثرات ہائبرڈ محاذ آرائی توں گھن تے جنگ تئیں کھنڈئے ہوئن ۔انہاں آکھیا جو اِیہوجے حالات اچ اساݙی مسلح افواج کوں زیادہ ہم آہنگی، سانجھے تعاون اَتے ہک سِرے مقصد نال تیار رہݨا ہوسی۔جنرل ساحر شمشاد مرزا آکھیا جو میں مسلح افواج وچال ہم آہنگی، سانجھی حکمت عملی اَتے تعاون کوں ہک اہم ضرورت سمجھداں، نہ جو ہک خواہش ۔ اے مستقبل دے چیلنجز دا سامݨا کرݨ کیتے ہک نہ ٹَلݨ آلی تنظیمی اصلاح اے۔ جنرل ساحر شمشاد مرزا ایں موقع تے زور ݙیندے آکھیا جو میں ایں ڳالھ کوں ضروری سمجھداں جو ہک مکمل بااختیار اَتے مناسب صلاحیت نال لیس مسلح افواج نظام کیتے ہک عملی ضرورت ہِن، اساݙی افواج کوں مربوط حکمت عملی نال مستقبل دیاں جنگاں کیتے تیار رہݨا ہوسی۔ میں ترائی افواج خاص طور تے جوائنٹ اسٹاف ہیڈکوارٹر کیتے آپݨیاں نیک تمناواں اَتے دعائیں وی پیش کرینداں ۔ جنرل ساحر شمشاد مرزا آکھیا جو اے ڈھانچہ جیویں وی قائم کیتا ونڄے، انہاں کوں آپݨیاں نوِیاں ذمہ واریاں کوں ایمانداری اَتے عزم نال پُورا کرݨا چاہیدے۔