بائیکاٹ کرݨ آلیاں کوں ضمنی انتخاب تے تنقید دا کوئی حق نئیں، اے آپݨیاں سیاسی غلطیاں لُکاوݨ کیتے الزام لیندِن، عطاء اللہ تارڑ

اسلام آباد۔ 27 نومبر(اے پی پی) وفاقی وزیر اطلاعات و نشریات عطاء اللہ تارڑ آکھیے جو پی ٹی آئی دے قول و فعل اچ تضاد اے، بائیکاٹ کرݨ آلیاں کوں ضمنی انتخاب تے تنقید دا کوئی حق نئیں، اے آپݨیاں سیاسی غلطیاں لُکاوݨ کیتے الزام لیندِن۔ قومی اسمبلی اچ الیندے وفاقی وزیر اطلاعات آکھیا جو سابق سپیکر اسد قیصر دے دور اچ ایوان دی ادھی فرنٹ لائن جیلاں اچ ہئی ٻھل اساں ول وی مذاکرات دی ڳالھ کریندے ہاسے، جݙاں کشمیر تے اجلاس سَݙیا ڳیا تاں انہاں دا لیڈر کائناں آیا جݙاں جو اساݙے اپوزیشن لیڈر اوں ویلھے اجلاس اچ موجود رہے، سارے زور اتے فسطائیت دے باوجود میاں شہباز شریف آکھیا ہا جو میثاق جمہوریت کیتے تیار ہیں ٻھل اے اوں ویلھے ڳالھ سݨݨ دی بجائے بُرا بھلا آہدے ہن جݙاں جو اساں مُلک دی ڳالھ کریندے پئے ہاسے، ہݨ وی سپیکر قومی اسمبلی انہاں کوں کئی واری مذاکرات کیتے آکھیا، کمیٹی وی بݨی، مرحوم عرفان صدیقی ایں کمیٹی دے رُکن ہن ٻھل پی ٹی آئی مذاکرات دے عمل کوں سبوتاژ کیتے، انہاں دی یادداشت محدود اے۔ انہاں آکھیا جو ضمنی انتخابات اچ انہاں آپ بائیکاٹ کیتے، جیڑھا میدان اچ کھیڈݨ نئیں آیا اوکوں ضمنی الیکشن تے ڳالھ کرݨ دا وی کوئی حق نئیں، انہاں سیاسی عمل دا حصہ بݨݨ توں انکار کیتے، الیکشن توں بائیکاٹ دا فیصلہ انہاں دی آپݨی جماعت دا ہا، ہݨ دھاندلی دا الزام لا تے خواہ مخواہ شور مچیندے پئِن۔ انہاں ہری پور توں بابر نواز خان کوں فتح تے مبارک ݙیندے آکھیے جو پوری کے پی کے دی صوبائی مشینری دے باوجود بابر نواز جیت تے کمال کیتے۔ وفاقی وزیر اطلاعات آکھیا جو نواز شریف دے نال جیڑھیاں زیادتیاں تھئن اوندے تے عدالتی ریلیف اعلیٰ عدالتاں توں مِلیا، جݙاں نواز شریف باہر ونڄݨا ہا تاں پی ٹی آئی دی آپݨی کابینہ فیصلہ کیتا ہا اتے اڄ ایندے تے تنقید وی کریندن جیندے کیتے انہاں کوں اپݨے گریبان اچ جھاتی پاوݨی چاہیدی اے۔ انہاں آکھیا جو دھاندلی دا شور کرݨ آلے ݙساوݨ جو انہاں دی لیگل دستاویزات کتھاں ہِن؟ ٹربیونل کیتے انہاں کیا کیس تیار کیتے؟ اساݙے اُتے وی اِیہ الزامات لیندن، میݙے کیس اچ وی میݙے خلاف پی ٹی آئی دا امیدوار کئی واری کورٹ توں بھڄ چُکیے، اے میڈیا اچ ٻیھ تے فارم 47 دا شور مچیندن اتے عدالتاں توں بھڄ ویندِن، اے انہاں دا دوہرا معیار اے جو میڈیا تے شور مچیندن اتے عدالت دستاویزی ثبوت منگے تاں تاریخاں منگدِن، انہاں اساݙے مخالف امیدواراں نال رَل تے میڈیا، سوشل میڈیا تے پُوری کمپین چلائی ایںدے باوجود انہاں کوں شکست فاش تھئی۔ وفاقی وزیر آکھیا جو سیاست اچ کݙاہیں بائیکاٹ نئیں ہوندا، آپݨی سیاسی غلطی کوں لُکاوݨ کیتے ایں ایوان، سپیکر اَتے میاں نواز شریف کوں الزام ݙیوݨ انہاں دا شرمناک عمل اے۔ وفاقی وزیر آکھیا جو انہاں دے ہر قول و فعل اچ تضاد اے، انہاں دے سوشل میڈیا اکاؤنسٹس فیلڈ مارشل اَتے پاک فوج کوں ٹارگٹ کریندن اَتے انہاں کوں انڈیا اَتے افغانستان اچ لائکس مِلدن، انہاں سوشل میڈیا اکاؤنسٹس دے ذریعے جو کمپین شروع کیتی اے اُو قابل مذمت اے، ہر پاکستانی اُوکوں مسترد کریندے، انہاں کوں مُنہ دی کھاوݨی پوسی۔