پی ٹی آئی اَتے وزیر اعلیٰ خیبر پختونخوا سہیل آفریدی دی ساری توجہ جیل رولز دے خلاف کرپشن کیس اچ سزا کَٹݨ آلے بانی توں سیاسی رہنمائی گھنݨ دے غیر قانونی مطالبے تے اے، عطاء اللہ تارڑ

اسلام آباد۔ 28 نومبر (اے پی پی) وفاقی وزیر اطلاعات تے نشریات عطاء اللہ تارڑ آکھیا جو پی ٹی آئی اَتے وزیر اعلیٰ خیبر پختونخوا سہیل آفریدی دی ساری توجہ ہک غیر قانونی مطالبے تے مرکوز اے جو کرپشن دے کیس اچ اڈیالہ جیل اچ سزا کَٹݨ آلے بانی توں ہی سیاسی رہنمائی گھنݨی چاہیدی اے جیڑھا جو جیل رولز دے خلاف اے۔ جمعہ کوں سماجی رابطے دے پلیٹ فارم “ایکس” تے آپݨی ہک پوسٹ اچ وفاقی وزیر اطلاعات آکھیا جو پاکستان تحریک انصاف (پی ٹی آئی) جئیں اچ خیبر پختونخوا دے وزیراعلیٰ سہیل آفریدی وی شامل ہِن، ایہو جیہا سیاسی طرزِ عمل اپنائے جئیں اچ صوبے دی عوام کیتے گورننس دی فراہمی پَچھوں چلی ڳئی اے اَتے ساری توجہ ہک غیر قانونی مطالبے تے مرکوز اے جو کرپشن دے کیس اچ اڈیالہ جیل اچ سزا کَٹݨ آلے بانی توں سیاسی رہنمائی گھنݨی چاہیدی اے جیڑھا جو جیل رولز دے خلاف اے۔ انہاں آکھیا جو دہشت گردی دے خلاف پاکستان دا ہک اہم صوبہ ہووݨ پاروں ایں دی بجائے جو صوبائی حکومت آپݨی ترجیحاں امن، ترقی اَتے عوامی ریلیف تے رکھیندی، جماعتی قیادت ݙینہہ رات اسلام آباد اچ ایہو غیر قانونی بیانیے دی سیاست گھمّیندی رہی اے۔ ایہو کائنی، مبینہ طور تے تحریک انصاف دی ہک تریمت سیاستدان انتہائی منفی حکمتِ عملی دے تحت افغانستان توں چلݨ آلے پاکستان دشمن اکاؤنٹس اَتے بھارتی میڈیا تے خان صاحب دے حوالے نال ہک گھٹیا مہم چلوائی جئیں نال پُوری دنیا اچ پاکستان دی بدنامی کرݨ دی کوشش کیتی ڳئی۔ انہاں آکھیا جو اے طرزِ عمل کھلی پاکستان دشمنی اے کیوںجو ایں نال مُلک دی ساکھ کوں نقصان ݙیوݨ دی کوشش کیتی ڳئی۔ تحریک انصاف کوں چاہیدے جو مُلک دشمن بیانیے اَتے غلط ترجیحاں ترک کر تے ہݨ ریاست اَتے عوام دے مفاد کوں اڳُوں رکھے۔