سائبر شیلڈ پالیسی نال ای گورننس، مالیاتی نظام اَتے ہیلتھ ڈیٹا کوں مضبوط تحفظ مِلیسی، وفاقی وزیر شزہ فاطمہ خواجہ

اسلام آباد۔ 28 نومبر (اے پی پی) وفاقی وزیر برائے انفارمیشن ٹیکنالوجی تے ٹیلی کمیونیکیشن شزہ فاطمہ خواجہ آکھیا جو سائبر شیلڈ پالیسی نال ای گورننس، مالیاتی نظام اَتے ہیلتھ ڈیٹا کوں مضبوط تحفظ مِلیسی، ڈیجیٹل نیشن پاکستان اچ نِجی شعبے دی سرمایہ کاری دی حوصلہ افزائی کیتی ویندی پئی اے۔ اے ڳالھیں انہاں “سائبر سکیورٹی، سائبر شیلڈ پالیسی اَتے مستقبل” دے موضوع تے تقریب نال خطاب کریندے ہوئیں کیتے۔ انہاں آکھیا جو سائبر شیلڈ پالیسی پاکستان دے ڈیجیٹل تحفظ دا اہم سنگ میل اے، سائبر شیلڈ پالیسی دے اجراء نال پاکستان دا ڈیجیٹل دفاع نویں دور اچ داخل تھی ڳئے، نویں پالیسی سرکاری تے نجی اداریاں کیتے متحدہ سکیورٹی فریم ورک فراہم کریسی۔ انہاں آکھیا جو ودھدے ڈیجیٹل خطرات دے پیش نظر سائبر سکیورٹی دی اہمیت کوں نظر انداز نئی کیتا ونج سڳدا، سائبر شیلڈ پالیسی نال ای گورننس، مالیاتی نظام اَتے ہیلتھ ڈیٹا کوں مضبوط تحفظ مِلیسی۔ انہاں آکھیا جو ایس آئی ایف سی بھرپور تعاون فراہم کریندی پئی اے، معرکہ حق دے دوران نینگراں ٹیکنالوجی دے شعبے اچ آپݨی مہارت نال مُلک دی ڈیجیٹل حداں دا دفاع کیتے اَتے جنگ جِتی، پُوری دنیا اساݙے نینگراں دی صلاحیتاں دی معترف تھی ڳئی اَتے جدید ٹیکنالوجی دے حامل ملکاں اچ اساݙے مُلک دا وقار اُچا تھیا، سائبر سکیورٹی قومی سلامتی نال جُڑیا ہویا معاملہ بݨ ڳئے، سائبر سکیورٹی دے شعبے اچ نینگراں کیتے موقع پیدا کیتے ویندے پئِن۔ ایں توں پہلے ہک ٻئی تقریب نال خطاب کریندیں ہوئیں شزہ فاطمہ خواجہ آکھیا جو پاکستان آئی ٹی دا شعبہ تیکھے ترقی کریندا پئے، آئی ٹی دے شعبے اچ وسیع سرمایہ کاری دے موقع موجود ہِن، ڈیجیٹل نیشن پاکستان دا مقصد مُلک اچ مکمل ڈیجیٹلائزیشن کرݨ اے، وزیر اعظم محمد شہباز شریف ذاتی طور تے ڈیجیٹل وژن دی نگرانی کریندے پئِن۔