وفاقی وزیر داخلہ محسن نقوی دا فیڈرل کانسٹیبلری دے افسراں اَتے جواناں نال اظہار یکجہتی، ایف سی ہیڈ کوارٹر پشاور دا دورہ

اسلام آباد۔ 28 نومبر(اے پی پی) وفاقی وزیر داخلہ محسن نقوی فیڈرل ہیڈ کوارٹر تے خودکش حملے دے واقعے دے بعد فیڈرل کانسٹیبلری (ایف سی) دے افسراں اَتے جواناں نال اظہار یکجہتی کیتے ایف سی ہیڈ کوارٹر پشاور پُڄ ڳئن۔ وزیر داخلہ یادگار شہداء تے حاضری ݙتی، پُھلاں دی چادر چڑھائی اَتے شہداء دے ایصال ثواب کیتے فاتحہ خوانی کیتی۔ایں دے بعد محسن نقوی حملے دی جاہ دا تفصیلی معائنہ کیتے اَتے فیڈرل کانسٹیبلری دے افسراں اَتے جواناں نال ملاقات کیتی، جتھاں انہاں ہک اہم اجلاس دی صدارت وی کیتی۔ محسن نقوی کوں بریفنگ اچ ݙسایا ڳیا جو فتنہ الخوارج نال تعلق رکھݨ آلے دہشت گرداں دا حملہ بروقت کارروائی پاروں ناکام بݨا ݙتا ڳیا۔ بریفنگ موجب ایف سی دے بہادر جواناں ٻہوں جرات مندی نال مقابلہ کریندے ترائے خودکش بمباراں کوں صرف ترائے منٹ دے اندر جہنم واصل کر ݙتا۔ایں موقع تے وزیر داخلہ فیڈرل کانسٹیبلری دے جواناں دی شجاعت اَتے غیر معمولی جذبے کوں زبردست خراج تحسین پیش کریندے آکھیا جو شہادت نوش کرݨ آلے ترائے جواناں دی قربانی کوں سلام پیش کرینداں۔ شہداء آپݨیاں جاناں قربان کرتے دہشت گرداں دے ناپاک ارادیں کوں ناکام بݨایا۔ انہاں دی اِے قربانی ہرگز ضائع کائناں ویسی۔ وزیر داخلہ آکھیا جو اہلکاراں جیڑھی دلیری نال بھارتی سپانسرڈ دہشت گرداں دا مقابلہ کیتے، اُو قابل تعریف اے۔محسن نقوی یقین ݙیوایا جو شہداء دے خانداناں دا آپݨے خاندان وانڳوں خیال رکھیا ویسی اَتے حکومت ہر طرح نال انہاں دے نال کھڑی اے۔ ایں موقع تے آئی جی خیبرپختونخوا پولیس ذوالفقار حمید، کمانڈنٹ فیڈرل کانسٹیبلری نذیر گاڑا اَتے ٻئے اعلیٰ سول و عسکری حکام وی موجود ہن