وکالت دا شعبہ ٻہوں مُقدس اے، وکیل لوکاں دے حقوق کیتے لَڑدے، چیف جسٹس لاہور ہائی کورٹ جسٹس عالیہ نیلم

ملتان۔ 28 نومبر(اے پی پی) چیف جسٹس لاہور ہائی کورٹ جسٹس عالیہ نیلم آکھیے جو وکالت دا شعبہ ٻہوں مُقدس اے، وکالت دنیا دے سارے شعبیں توں زیادہ قابل احترام اے، وکالت آئین و قانون تے چلݨ اَتے چلاوݨ آلا شعبہ اے، کہیں وی شعبے دے لوکاں کوں پریشانی ہووے تاں او وکیل کنے آندن، وکیل ہی انہاں کوں انصاف ݙیواوݨ اچ آپݨا رول ادا کریندے، وکیل لوکاں دے حقوق کیتے لَڑدے، کہیں وی معاشرے اچ وکیل دا کردار مثالی ہُوندے۔اے ڳالھ انہاں ہائی کورٹ بار ملتان اچ ڈے کئیر سنٹر اَتے فی میل کامن روم دی افتتاحی تقریب نال خطاب کریندے آکھی۔ چیف جسٹس لاہور ہائی کورٹ عالیہ نیلم آکھیا جو وکالت دے شعبے دی عزت و وقار اچ مزید ودھارے کیتے ضروری اے جو وکلاء اتحاد دی مثال قائم کرن۔ اَتے لوکاں کوں وقتی انصاف ݙیواوݨ اچ پہلے وی محنت کریندے پئن اَتے آوݨ آلے ویلھے اچ وی آپݨا رول ادا کریسن۔ انہاں آکھیا جو بارز کوں پیش آوݨ آلے مسئلیں دے حل کیتے او پہلے وی کوشاں ہِن اَتے آوݨ آلے ویلھے اچ وی آپݨا ہر ممکن تعاون و کوشش جاری رکھیسن۔چیف جسٹس عالیہ نیلم آکھیا جو ملتان ہائی کورٹ بار ہک تاریخی اَتے تعاون کرݨ آلی بار اے، جیں کوں جتنا وی خراج تحسین پیش کیتا ونڄے گھٹ اے، کیسز اچ سائلین اَتے وکلاء دی سہولت کیتے بائیو میٹرک پروگرام لانچ کریندے پیوں ، پُورے پنجاب اچ لیڈیز بار رومز دے انعقاد اَتے آئی ٹی نال جُڑیاں سہولتاں وقتی شروع تھی ویسن، تریمت وکلاء کوں جدید سہولتاں ݙتیاں ویسن۔ایں موقع تے چیف جسٹس لاہور ہائی کورٹ ملتان ہائی کورٹ اچ ڈے کئیر سنٹر اَتے فی میل کامن روم دا افتتاح کیتا اَتے دورہ کیتے۔ ایں دوران ملتان ہائی کورٹ بار ایسوسی ایشن دے صدر محمد اظہر خان مغل، جنرل سیکرٹری صفدر سرسانہ سیال، ڈسٹرکٹ بار ایسوسی ایشن ملتان دے صدر ملک جاوید ڈوگر، سیکرٹری ملک عدنان احمد اَتے ہائی کورٹ و ڈسٹرکٹ بار دے ٻئے عہدیداران سودھے وکلاء دی وݙی تعداد موجود ہئی۔ ایں توں انڄ چیف جسٹس لاہور ہائی کورٹ ملتان ہائی کورٹ بار ایسوسی ایشن اَتے ڈسٹرکٹ بار ایسوسی ایشن دے وفداں نال ملاقاتاں کیتیاں۔ وفداں وکلاء و بارز کوں پیش آوݨ آلے مسلیں دا چیف جسٹس لاہور ہائی کورٹ کوں ݙسایا ۔چیف جسٹس لاہور ہائی کورٹ وکلاء و بارز دے مسلیں دے حل کیتے ہر ممکن تعاون دا یقین ݙیوائے ۔ ایں دوران چیف جسٹس لاہور ہائی کورٹ کوں سوینیئر اَتے گلدستہ وی پیش کیتا ڳیا