وزیراعظم شہباز شریف دی قیادت اچ سارے شعبیاں اچ شفافیت، کارکردگی اَتے بہتر عوامی سہولتاں دے اقدامات جاری ہین، اویس احمد خان لغاری دا 118 ہیلپ لائن سروس دی افتتاحی تقریب نال خطاب

اسلام آباد۔ 28 نومبر(اے پی پی) وفاقی وزیر توانائی سردار اویس احمد خان لغاری آکھیے جو وزیراعظم محمد شہباز شریف دی قیادت اچ سارے شعبیاں اچ شفافیت، کارکردگی اَتے عوامی سہولتاں اچ بہتری کیتے عملی اقدامات جاری ہین، اساں بجلی دے صارفین کوں سہولتاں ݙیوݨ کتیے کم کریندے پئے ہیں، وزارتی توانائی اچ شفافیت اپنائی ویندی پئی اے، سارے شعبیاں اچ سفارشی کلچر دا خاتمہ وزیراعظم دا وژن اے۔ اے ڳالھ انہاں بجلی دے صارفین دی سہولت کیتے ٻݨݨ الی 118 ہیلپ لائن سروس دی افتتاحی تقریب نال خطاب اچ آکھی۔ وفاقی وزیر آکھیا جو وزارت توانائی اچ اصلاحات دے ایجنڈے تے بھرپور انداز اچ عمل کیتا ویندا پئے، نویں سروس نال بجلی دے صارفین دیاں شکایتاں فوری طور تے ریکارڈ تھیسن، انہاں دا ہر مرحلے تے سٹیٹس معلوم کیتا ونج سڳسی اَتے محکمہ دی کہیں وی غلطی یا کوتاہی کوں لکایا نا ونڄ سڳسی۔ انہاں آکھیا جو 118 سروس نال ساݙی ہر غلطی عوام دے سامݨے آویسی، ایہا حقیقی شفافیت اے جو ادارہ آپ کوں احتساب کیتے پیش کرے، وزارت توانائی سودھا سارے اداریاں اچ سفارشی کلچر دا مکمل خاتمہ کیتا ویسی اتےھ اینڄھا نظام بݨایا ویندا پئے جو ہر شہری کیتے ہکو سویں سہولت ہووے۔ اویس لغاری آکھیا جو ایں جدید شکایات سسٹم نال مُلک بھر دے سارے صارف خواہ او کہیں وی طبقے نال تعلق رکھیندے ہووݨ، ہک ہی پلیٹ فارم تے آپݨیاں شکایتاں درج کرا سڳسن۔ اے ہک وݙی سماجی اصلاح اے، ہک انقلاب اے جیںدا براہ راست فائدہ پاکستان دے 3 کروڑ 80 لکھ گھرانیاں کوں پڄسی۔