عالمی یومِ یکجہتی فلسطین تے سردار ایاز صادق دا پیغام

اسلام آباد۔ 29 نومبر(اے پی پی) قومی اسمبلی دے سپیکر سردار ایاز صادق فلسطینی عوام نال پاکستان دی غیر متزلزل حمایت اَتے مکمل یکجہتی دے عزم دا اعادہ کریندے آکھیے جو گزریل سَت ݙہاکیاں توں ودھ عرصے توں فلسطین اچ جاری اسرائیلی جارحیت اَتے انسانی حقوق دیاں سنگین پامالیاں پاروں مشرقِ وسطیٰ اچ پائیدار امن دا قیام محض ہک خواب بݨ تے رہ ڳئے۔ اے ڳالھ انہاں عالمی یومِ یکجہتی فلسطین دے موقع تے آپݨے ہک پیغام اچ کیتے جو ہر سال 29 ستمبر کوں اقوام متحدہ دے زیر اہتمام منایا ویندے۔سپیکر قومی اسمبلی غزہ اچ جاری اسرائیلی جارحیت دی شدید مذمت کریندے آکھیا جو مسلسل حملیں اَتے اقوامِ متحدہ دی سلامتی کونسل دیاں قرارداداں تے عمل درآمد نہ تھیوݨ دے نتیجے اچ غزہ اچ تاریخ دا بدترین انسانی بحران پیدا تھی چُکیے۔ انہاں آکھیا جو فلسطینی عوام کوں منظم طریقے نال انہاں دے ناقابلِ تنسیخ حقِ خودارادیت توں محروم رکھیا ویندا پئے سپیکر سردار ایاز صادق غزہ تے مسلط غیر قانونی اَتے سفاکانہ محاصریاں دی بھرپور مذمت کریندے ہوئیں آکھیا جو غذائی امداد، بنیادی ضرورتاں اَتے جان بچاوݨ آلیاں دوائیاں دی ترسیل اچ رکاوٹ پاوݨ جنگی جُرم اے۔ انہاں ایں عمل کوں بہوں غیر اخلاقی اَتے غیر انسانی اقدام قرار ݙتا۔غزہ دی تباہ حال معاشرتی اَتے معاشی صورتحال دا حوالہ ݙیندے سپیکر آکھیا جو فلسطینی عوام شدید انسانی بحران اَتے محرومیاں دا شکار ہِن جتھاں روزمرہ زندگی بُری طرح متاثر تھی چُکی اے اَتے شہریاں کوں خوراک، علاج، صاف پاݨی، رہائش اَتے سلامتی جیھے بنیادی انسانی حقوق تئیں وی رَسائی حاصل کائنی۔سپیکر سردار ایاز صادق آکھیا جو مستقل سفارتی کوششاں اَتے علاقائی و عالمی فورمز تے فلسطینی موقف دے مؤثر دفاع پاروں عالمی رائے عامہ اچ نمایاں تبدیلی ݙیکھݨ اچ آئی اے۔ انہاں آکھیا جو ریاستِ فلسطین کوں ہݨ تئیں اقوامِ متحدہ دے 157 رُکن ملکاں تسلیم کر ڳھدے، جو عالمی ادارے دی مجموعی رکنیت دا 81 فیصد بݨدے۔ اِے فلسطینی جدوجہد کوں حاصل تھیوݨ آلی بھرپور اخلاقی، قانونی اَتے سیاسی حمایت دا واضح ثبوت اے۔سپیکر قومی اسمبلی آکھیا جو پاکستان ہمیشہ فلسطینی عوام دے رلےکھڑا رہیے اَتے سفارتی، اخلاقی اَتے سیاسی سطح تے ہر ممکن تعاون کریندا رہیے۔ انہاں آکھیا جو اقوامِ متحدہ دے ہک ذمہ دار رُکن اَتے سلامتی کونسل دے غیر مستقل رُکن دی حیثیت نال پاکستان فلسطینی عوام دے ناقابلِ تنسیخ حقِ خودارادیت دے حصول اَتے 1967ء توں پہلے دی سرحداں تے مبنی ہک آزاد، خودمختار اَتے قابلِ عمل ریاستِ فلسطین، جیں دا دارالحکومت القدس الشریف ہووے، دے قیام کیتے عالمی و علاقائی فورمز تے مؤثر آواز چیندا رہسی۔سپیکر سردار ایاز صادق عالمی برادری تے زور ݙتا جو او غزہ اچ جاری نسل کشی کوں فوری طور تے رُکواوݨ، غیر انسانی محاصرہ ختم کراوݨ اَتے فلسطینی عوام کیتے پائیدار امن، انصاف اَتے انسانی وقار کوں یقینی بݨاوݨ کیتے عملی اَتے وقتی اقدامات کرے