صدر مملکت آصف علی زرداری دا بین الاقوامی یوم یکجہتی فلسطین تے پیغام

اسلام آباد۔ 29 نومبر(اے پی پی) صدر مملکت آصف علی زرداری آکھیے جو پاکستان ہمیشہ توں فلسطینی عوام دے نال ثابت قدمی نال کھڑا رہیے، فلسطینیاں کیتے اساݙی حمایت انسانیت، انصاف اَتے برابری دیاں بنیادی قدراں تے قائم اے، پاکستان اَتے فلسطین دے عوام دے وچال محبت، احترام اَتے بھرپی دا رشتہ اے، اوکھے حالات اچ وی پاکستانی قوم ہمیشہ آپݨے فلسطینی بھیݨ بھراواں دا ساتھ ݙیتے۔ایوان صدر دے پریس ونگ موجب ، صدر مملکت بین الاقوامی یوم یکجہتی فلسطین تے آپݨے پیغام اچ آکھیا جو فلسطین دی حمایت پاکستان دی سنڄاݨ دا حصہ رہی اے، اتھاں تئیں جو پاکستان بݨݨ توں سَت سال پہلے 1940ء دی قرارداد لاہور اچ وی فلسطین دے حقِ خودارادی دی واضح حمایت شامل ہئی۔ انہاں آکھیا جو اڄ بین الاقوامی یوم یکجہتی فلسطین دے موقع تے میں بہادر فلسطینی عوام کوں دلوں سلام پیش کرینداں جنہاں بے مثال ہمت، ثابت قدمی اَتے غیر متزلزل حوصلے نال تاریخ اچ ہک نواں باب لکھیے۔ صدر مملکت آکھیا جو پاکستان فلسطین دے نال آپݨے پراݨے اَتے نیڑے دے برادرانہ تعلقات کوں ٻہوں اہمیت ݙیندے۔ صدر آصف علی زرداری آکھیا جو پاکستان ہمیشہ غزہ اچ اسرائیلی قابض فوج دے ظلم دی شدید مذمت کیتی اے اَتے ہر عالمی فورم تے فلسطینیاں کیتے آواز چاتی اے۔ اساں مسلسل فوری اَتے مستقل جنگ بندی، انسانی امداد دی بلا رکاوٹ فراہمی، شہریاں دے تحفظ اَتے اسرائیلی جنگی جرائم تے مکمل احتساب دا مطالبہ کریندا رہسے۔انہاں آکھیا جو اقوام متحدہ، او آئی سی، آئی سی جے اَتے ٻئے عالمی فورمز تے وی پاکستان فلسطینی عوام دے بنیادی اَتے ناقابل تنسیخ حقوق کیتے مسلسل سرگرم رہیے۔ صدر مملکت آکھیا جو غزہ امن معاہدے اچ وی پاکستان مثبت اَتے تعمیری کردار ادا کیتے، ایں امید دے نال جو اسرائیلی ظلم و جارحیت نال فلسطینی عوام تے ڈھائے ڳئے ناقابل تصور ݙُکھاں دا خاتمہ تھی سڳسی۔ انہاں آکھیا جو پاکستان آپݨے فلسطینی بھراواں اَتے بھیݨاں دی ہر طرح دی سیاسی، سفارتی، انسانی اَتے اخلاقی حمایت جاری رکھیسی، اساں آپݨے ایں موقف دا اعادہ کریندوں جو فلسطین جون 1967ء توں پہلے آلی سرحداں موجب ہک آزاد، خودمختار اَتے مضبوط ریاست دے طور تے قائم تھیوے اَتے ایں دا دارالحکومت القدس الشریف ہووے۔صدر مملکت دعا کریندے آکھیا جو فلسطینی عوام دی جدوجہد اَتے ہمت دنیا دے سُتے ہوئے ضمیر کوں جگا ݙیوے اَتے دنیا اچ انصاف اَتے امن دی جِت تھیوے۔ انہاں آکھیا جو میݙی اِے دلی خواہش وی اے جو ہک ݙینھ میکوں مسجد اقصیٰ اچ آپݨے فلسطینی بھراواں دے نال نماز ادا کرݨ دی سعادت حاصل تھیوے