وفاقی وزیر مواصلات عبدالعلیم خان دی آچ ہولڈنگ دے وفد نال ملاقات

استنبول۔ 29 نومبر (اے پی پی) وفاقی وزیرِ مواصلات عبدالعلیم خان نال ترکی دی معروف کمپنی آچ ہولڈنگ دے ٹرانسپورٹیشن اینڈ انفراسٹرکچر گروپ دے اعلیٰ سطحی وفد چیف ایگزیکٹو افسر سیرہات سوؤکپنار دی قیادت اچ استنبول اچ ملاقات کیتی۔ملاقات دے دوران وفاقی وزیر وفد کوں پاکستان دے انفراسٹرکچر سیکٹر اچ دستیاب وسیع سرمایہ کاری دے مواقع توں آگاہ کیتے۔ انہاں آکھیا جو حکومت پاکستان مُلک دے ٹرانسپورٹ اَتے کمیونیکیشن سسٹم کوں جدید لائناں تے پکا کرݨ کیتے پُرعزم اے اَتے بین الاقوامی سرمایہ کاراں کوں سرمایہ کار دوست پالیسیاں توں بھرپور فیدہ چاوݨا چاہیدے۔عبدالعلیم خان عالمی شہرت یافتہ انفراسٹرکچر کمپنیاں دے نال مضبوط شراکت داری دے قیام اچ گھاٹی دلچسپی دا اظہار کریندے آکھیا جو ایہو جیہے اشتراک نال ترقیاتی منصوبیں اچ تیزی اَتے معاشی ترقی دے نویں دروازے کھُلِسَن۔ آچ ہولڈنگ دے وفد پاکستان اچ مستقبل دے انفراسٹرکچر منصوبیں اچ تعاون اَتے سرمایہ کاری دے امکانات دا جائزہ گھنݨ اچ بھرپور دلچسپی ظاہر کیتی۔ملاقات ایں عزم نال مُکی جو ݙوہیں فریق نیڑے دا رابطہ برقرار رکھیندے پاکستان دے ودھدے انفراسٹرکچر سیکٹر اچ عملی تعاون دے موقع تلاش کریسن۔ واضح رہے جو آچ ہولڈنگ ترکی دا ہک وݙا اَتے متنوع کاروباری گروپ اے، جیڑھا 1969 اچ قائم تھیا۔ اِے گروپ تعمیرات، انفراسٹرکچر، توانائی، سیاحت اَتے صنعتی شعبیں اچ نمایاں سرگرمیاں رکھیندے اَتے پُل، موٹرویز، بندرگاہواں، ہوائی اݙے، اَتے توانائی دی پیداوار و تقسیم جیہے وݙے منصوبیں دی تعمیر دا وسیع تجربہ رکھیندے۔