ہندوستان اچ خود فریبی دی سوچ رکھݨ آلی قیادت دی اجارہ داری اے، سندوراچ تھئی شکست تے ول ول دے کوڑے ہندوستانی بیانات عوامی کاوڑ کوں مُکاوݨ کیتے ہِن، اساں حق تے ہاسے اَتے حق ہمیشہ فتح یاب تھیندے ، ڈی جی آئی ایس پی آر

راولپنڈی۔ 29 نومبر(اے پی پی) ڈی جی آئی ایس پی آر آکھیے جو ہندوستان اچ خود فریبی دی سوچ رکھݨ آلی قیادت دی اجارہ داری اے۔ آئی ایس پی آر توں جاری بیان موجب، ڈی جی آئی ایس پی آر آکھیے جو انڈین آرمی چیف دا اِے بیان جو اساں آپریشن سندور دے دوران ہک ٹریلر ݙِکھایا، خود فریبی دی حامل سوچ دا عکاس اے۔ جیں ٹریلر اچ سَت جہاز ڈھہہ ونڄن، 26 جہیں تے حملہ تھی ونڄے اَتے ایس-400 دیاں بیٹریاں تباہ تھی ونڄن تاں ایہو جیہے ٹریلر تے مبنی فلم انہاں کیتے ہر فلم بݨ ویسی۔ سندور اچ تھئی شکست تے ول ول کوڑے ہندوستانی بیانات عوامی غصے کوں مُکاوݨ کیتے ہِن۔انہاں آکھیا جو کوئی وی مُلک جے افغان طالبان رجیم کوں فوجی ساز و سامان ݙیندے تاں اِے دہشت گرداں دے ہتھ ہی لڳسی۔ ڈی جی آئی ایس پی آر آکھیے جو ریاست پاکستان اَتے ایں دے اداریں دے خلاف زہریلا بیانیہ بݨاوݨ آلے ایکس اکاؤنٹس ٻاہرلے مُلک توں چلدن۔ پاکستان توں ٻاہر ٻہہ تے اتھاں دی سیاست اَتے ٻئے معاملیں اچ زہر پاوݨ دی کوشش کیتی ویندی اے۔ ٻاہرلے مُلک توں آپریٹ تھیوݨ آلے سوشل میڈیا دے اِے اکاؤنٹس ہر ویلھے پاکستان دے خلاف بیانیہ بݨاوݨ اچ مصروف ہِن۔ اِے ڳالھ واضح اے جو جو سوشل میڈیا پاکستان اچ چلیندا پئے درحقیقت ایں دے پِچھوں ٻاہرلے ہتھ ہِن۔انہاں آکھیا جو ساریاں حکومتاں اَتے سیاسی پارٹیاں دا اتفاق اے جو دہشت گردی دا حل نیشنل ایکشن پلان اچ اے، ایں پلان کوں عملی جامہ پواوݨ کیتے بلوچستان اچ ہک مربوط نظام بݨایا ڳئے جݙاں جو خیبر پختونخوا اچ ایں دی کمی نظر آندی اے۔ ڈی جی آکھیا جو ایں نظام دے تحت ضلعی، ڈویژنل اَتے صوبائی سطح تے سٹیئرنگ، مانیٹرنگ اَتے امپلیمنٹیشن کمیٹیاں بݨائیاں ڳئن۔انہاں آکھیا جو ایرانی ڈیزل دی سمگلنگ غیر قانونی سپیکٹرم دی وݙی وجہ اچوں ہک اے۔ ایں مد اچ حاصل تھیوݨ آلی رقم دہشت گردی دے ودھارے کیتے استعمال کیتی ویندی اے۔ ایرانی ڈیزل دی سمگلنگ تے آرمی، ایف سی اَتے صوبائی حکومت دے کریک ڈاؤن توں پہلے 20.5 ملین لیٹر ڈیزل دی روز دی سمگلنگ تھیندی ہئی۔ اِے مقدار گھٹ تھی تے2.7 ملین لیٹر روزانہ تے آ چُکی اے۔ ایران توں سمگل تھیوݨ آلے ڈیزل دی مد اچ حاصل تھیوݨ آلی رقم بی ایل اے اَتے بی وائی سی کوں ویندی اے۔نیشنل ایکشن پلان تے عمل درآمد پاروں بلوچستان دے 27 ضلعیں کوں پولیس دے دائرہ اختیار اچ گھن آیا ڳئے جیڑھا جو بلوچستان دا86 فیصد حصہ اے۔ بلوچستان اچ صوبائی حکومت اَتے سکیورٹی فورسز مقامی لوکاں نال مسلسل انگیجمنٹ کریندے پئن۔ ایہو جہیاں روزانہ140 اَتے ماہانہ 4000 انگیجمنٹ تھییندیاں پئن جیں دے ٻہوں پرے دے نتائج ہِن۔ انہاں حکومتی اقدامات دے بغیر دہشت گردی کوں قابو کائنی کیتا ونڄ سڳدا۔بیان اچ آکھیا ڳئے جو 25 نومبر کوں ڈی جی آئی ایس پی آر دی سینئر صحافیاں نال مُلکی سلامتی دے امور تے تفصیلاً ڳالھ مہاڑ اچ ڈی جی آئی ایس پی آر ݙسایا جو 4 نومبر 2025 توں ہݨ تئیں دہشت گردی دے خلاف 4910 انٹیلی جنس بیسڈ آپریشنز کیتے ڳئے۔ انہاں آپریشنز دے دوران 206 دہشت گرداں کوں جہنم واصل کیتا ڳیا۔ گزریل سال مُلک بھر اچ 67023 انٹیلی جنس بیسڈ آپریشن کیتے ڳئے۔ گزریل سال صوبہ خیبر پختونخوا اچ 12857 اَتے صوبہ بلوچستان اچ 53309 انٹیلی جنس بیسڈ آپریشن کیتے ڳئے۔ گزریل سال مجموعی طور تے 1873 دہشت گرد جہنم واصل تھئے جنہاں اچ 136 افغانی وی شامل ہِن۔بارڈر مینجمنٹ تے سکیورٹی اداریں دے حوالے نال گمراہ کُن پروپیگنڈا کیتا ویندے۔ پاک افغان بارڈر ٻہوں اوکھے اَتے دشوار گزار رستیں تے مشتمل اے۔ خیبر پختونخوا اچ پاک افغان سرحد1229 کلومیٹر تے مشتمل اے، جیں اچ 20 کراسنگ پوائنٹس ہِن۔ پاک افغان بارڈر تے پوسٹاں دا فاصلہ 20 توں 25 کلومیٹر تئیں وی اے۔ بارڈر فینس ایں ویلھے تئیں مؤثر کائنی تھی سڳدی جے او آبزرویشن اَتے فائر نال کور نہ تھیوے۔ جے 2 توں 5 کلومیٹر دے بعد قلعہ بݨاوݨ اَتے ڈرون سرویلنس کرݨ کیتے ٻہوں وسائل دی لوڑھ ہوسی۔ پنجاب اَتے سندھ دے برعکس خیبر پختونخوا اچ بارڈر دے ݙوہیں پاسے وَنڈے ہوئے وستیاں ہِن۔ ایہو جیہی صورتحال اچ آونڄ کوں کنٹرول کرݨا ہک چیلنج اے۔ دنیا اچ بارڈر مینجمنٹ ہمیشہ ݙوہیں ملک رَل تے کریندن۔ ایں دے برعکس، افغانستان توں دہشت گرداں دی پاکستان اچ دراندازی کیتے افغان طالبان مکمل سہولت کاری کریندن۔ جے افغان بارڈر نال لڳدے علاقیں کوں ݙٹھا ونڄے تاں اتھاں ٻہوں مشکل نال مؤثر انتظامی ڈھانچہ ݙیکھݨ کوں مِلدے جے گورننس دے مسلیں اچ ودھارے دا باعث اے۔ انہاں بارڈر ایریاز اچ ٻہوں مضبوط پولیٹیکل ٹیرر کرائم گٹھ جوڑ اے جیں دی سہولت کاری فتنہ الخوارج کریندن۔انہاں سوال کیتے جے سرحد پار توں دہشت گرداں دیاں تشکیلاں آندیاں پئن یا غیر قانونی سمگلنگ اَتے تجارت تھیندی پئی اے تاں اندرلے مُلک اوں کوں روکݨا کئیں دی ذمہ واری اے؟ جے لکھاں نان کسٹم پیڈ گاݙیاں تہاݙے صوبے اچ پِھردیاں پئِن تاں انہاں کوں کیں روکݨا اے؟ نان کسٹم پیڈ گاݙیاں ایں پولیٹیکل ٹیرر کرائم نیکسز دا حصہ ہِن جو خودکش حملیں اچ استعمال تھییندن۔افغانستان نال دوحہ معاہدے دے حوالے نال پاکستان دا موقف بالکل واضح اے۔ پاکستان دا موقف اے جو افغان طالبان رجیم دہشت گرداں دی سہولت کاری بند کرے۔ افغانستان اچ دہشت گردی دے مرکز اَتے القاعدہ، داعش اَتے دہشت گرد تنظیماں دی قیادت موجود اے۔ اُتھاں توں انہاں کوں اسلحہ اَتے فنڈنگ وی مِلدی اے جیڑھی پاکستان دے خلاف استعمال تھیندی اے۔ اساں انہاں دے سامݨے سارے ثبوت رکھئن جنہاں کوں او نظر انداز کائنی کر سڳدے۔ پاکستان دا افغان طالبان رجیم توں مطالبہ اے جو او ہک قابلِ تصدیق میکانزم دے تحت معاہدہ کرن۔ جے قابلِ تصدیق میکنزم تھرڈ پارٹی رکھݨا اے تاں پاکستان کوں ایں تے اعتراض کائناں ہوسی۔ پاکستان دے ایں موقف دی مکمل آگاہی ثالث ملکاں کوں وی اے۔فتنہ الخوارج دے بارے اچ طالبان رجیم دا اِے دعویٰ جو او پاکستانی ہِن، ہجرت کرتے آئن اَتے اساݙے مہمان ہِن، غیر منطقی اے۔ جے او پاکستانی شہری ہِن تاں اساݙے حوالے کرن، اساں انہاں کوں آپݨے قانون موجب ڈیل کریسے۔ اِے کیویں دے مہمان ہِن جو مسلح تھی تے پاکستان آندن؟‏SIGAR دی رپورٹ دےموجب امریکی فوجاں انخلا دے دوران $7.2 بلین دے امریکی فوجی ساز و سامان افغانستان چھوڑ ڳئن۔ افغان رجیم نہ صرف پاکستان بلکہ پُورے خطے اَتے دنیا کیتے ہک خطرہ بݨ چُکیے۔ افغانستان اچ 2021 دے بعد ریاست اَتے حکومت دا قیام تھیوݨا ہئی جیڑھا ممکن نہ تھی سڳیا۔ طالبان رجیم ایں ویلھے نان سٹیٹ ایکٹر پالے ہوئن جیڑھے خطے دے مُختلف ملکاں کیتے خطرہ ہِن۔ پاکستان دا مطالبہ واضح اے جو افغان طالبان دا طرز عمل ہک ریاست وانگوں تھیوݨا چاہیدے۔ دوحہ مذاکرات اچ افغان طالبان بین الاقوامی برادری نال آپݨی سرزمین دہشت گردی کیتے استعمال نہ تھیوݨ دا وعدہ کیتا پر ایں تے ہݨ تئیں عمل کائنی تھیا۔ افغان طالبان رجیم افغانیاں دا نمائندہ کائنی کیوں جو اِے ساریاں قومیتیاں دی نمائندگی کائنی کریندا۔ افغانستان دی 50 فیصد تریمتاں دی نمائندگی دا ایں رجیم اچ کوئی وجود کائنی۔ اساݙا افغانیاں نال کوئی مسئلہ کائنی، بلکہ اساݙا مسئلہ افغان طالبان رجیم دے نال اے۔پاکستان اَتے افغانستان وچال تجارت دی بندش دا مسئلہ اساݙی سکیورٹی اَتے عوام دے جان و مال دے تحفظ نال جُڑیا ہویا اے۔ خونریزی اَتے تجارت کٹھے کائنی چل سڳدے۔ اساݙے کیتے چنڳے یا بُرے دہشت گرد اچ کوئی فرق کائنی، اساݙے کیتے چنڳا دہشت گرد اوہو اے جیڑھا جہنم واصل تھی چُکیا۔ ہمیشہ حق باطل تے غالب آندے۔ اساں حق تے ہاسے اَتے حق ہمیشہ فتح یاب تھیندے۔افغان مہاجرین دی باعزت وطن واپسی دے عمل دے تحت 2024 اچ 366,704 جݙاں جو 2025 اچ 971,604 افراد کوں واپس بھیجیا ونج چُکیا لوکاں کوں صرف ایں مہینے یعنی نومبر دے دوران 239,574 لوکاں واپس بھیجیا ڳیا۔