صدر آصف علی زرداری دا نیشنل ڈیفنس یونیورسٹی دا دورہ، 27 ویں نیشنل سکیورٹی ورکشاپ دے شرکاء نال خطاب

اسلام آباد۔ 29 نومبر (اے پی پی) صدر مملکت آصف علی زرداری نیشنل ڈیفنس یونیورسٹی اسلام آباد دا دورہ کیتے اَتے 27 ویں نیشنل سکیورٹی ورکشاپ دے شرکاء نال خطاب کیتے۔ایوان صدر توں جاری بیان موجب ورکشاپ ارکان پارلیمنٹ، سینئر سِول اَتے فوجی افسراں، تعلیمی اداریں اَتے سول سوسائٹی دے نمائندیں کوں کٹھے تھیوݨ دا موقع ݙتے۔ صدر مملکت آپݨے خطاب اچ ورکشاپ کوں کامیابی نال مکمل کرݨ تے شرکاء کوں مبارخ ݙتی اَتے قومی سلامتی دے بارے اچ آگاہی کوں مضبوط بݨاوݨ کیتے انہاں دی لگن دی تعریف کیتی۔ انہاں پاکستان دے عصری سلامتی دے چیلنجز نال نِمٹݨ کیتے باخبر قیادت، قومی ہم آہنگی اَتے مربوط پالیسی سازی دی اہمیت تے زور ݙتا۔آئی ایس پی آر موجب 27 ویں نیشنل سکیورٹی ورکشاپ اچ جامع قومی سلامتی دے فریم ورک دے تحت قومی طاقت دے مُختلف عناصر وچال سانجھے تعامل دے اچ شرکاء دی سمجھ کوں ودھاوݨ تے توجہ مرکوز کیتی ڳئی۔ نیشنل ڈیفنس یونیورسٹی دی قومی سلامتی ورکشاپ قومی سطح دے مکالمے کوں فروغ ݙیوݨ، ادارہ جاتی صلاحیت کوں ودھاوݨ اَتے قومی سلامتی کیتے پورے مُلک دے نقطہ نظر کوں ودھارا ݙیوݨ کیتے مُلک دے اہم پلیٹ فارمز اچوں ہک اے۔ صدر مملکت گریجویٹ تھیوݨ آلے شرکاء کوں سنداں وی ݙتیاں