حکومت تاجراں دے مسئلیں دے حل اَتے کاروباری ماحول کوں بہتر بݨاوݨ کیتے پُوری طرح پُرعزم اے، محمد حنیف عباسی

اسلام آباد۔ 29 نومبر(اے پی پی) وفاقی وزیر ریلوے محمد حنیف عباسی آکھیے جو حکومت تاجراں دے مسئلیں دے حل اَتے کاروباری ماحول کوں بہتر بݨاوݨ کیتے پُوری طرح پُرعزم اے۔ او اسلام آباد چیمبر آف کامرس اینڈ انڈسٹری (آئی سی سی آئی) اچ نویں تزئین و آرائش شدہ منور مغل ہال دے افتتاح دے موقع تے تقریب نال خطاب کریندے پئے ہن۔ ایں موقع تے آئی سی سی آئی دے عہدیداران، کاروباری شخصیات اَتے میڈیا نمائندگان دی وݙی تعداد موجود ہئی۔حنیف عباسی آپݨے خطاب اچ آکھیا جو وزیراعظم شہباز شریف دی قیادت اچ حکومت کاروبار دوست پالیسیاں دی تشکیل کیتے ساریاں متعلقہ پالیسیاں تے نظر ثانی کریندی پئی اے۔ انہاں آکھیا جو برآمدات اچ ودھارا اَتے زرمبادلہ دے ذخیرے کوں مستحکم کرݨ حکومتی ترجیح اچ شامل ہِن۔ وفاقی وزیر اِے وی ݙسایا جو پاکستان ریلویز دی جدید کاری تکھے جاری اے اَتے مُلک دے سارے وݙے ریلوے اسٹیشن ڈیجیٹل سسٹم نال لیس تھی چُکِن۔وفاقی وزیر اعلان کیتا جو او وقتی ہی وزیر داخلہ محسن نقوی دے نال آئی سی سی آئی دی قیادت دی ملاقات دا انتظام کریسن تاں جو سی ڈی اے نال متعلق مسلیں دے حل اچ مدد مِل سڳے، انہاں پاکستان دی مسلح افواج کوں اڄوکے معرکے اچ “تاریخی فتح” تے خراجِ تحسین پیش کریندے آکھیا جو آئی سی سی آئی معاشی اصلاحات دے سلسلے اچ ہمیشہ سرگرم کردار ادا کریندا رہیے۔