عالمی برادری اسرائیلی جارحیت، انسانی حقوق دیاں خلاف ورزیاں اَتے فلسطینی عوام تے جاری ظلم و ستم دا وقتی نوٹس گھنے، پاکستان

اسلام آباد۔ 29 نومبر(اے پی پی) دنیا اچ ہفتے کوں فلسطینی عوام نال یکجہتی دا عالمی ݙینھ منایا ڳیا۔ ایں عالمی ݙینھ دے موقع تے پاکستان ہک واری ول عالمی برادری تے زور ݙتے جو او اسرائیلی جارحیت، انسانی حقوق دیاں خلاف ورزیاں اَتے فلسطینی عوام تے جاری ظلم و ستم دا فوری نوٹس گھنے اَتے خطے اچ دیرپا امن کیتے عملی کردار ادا کرے۔اے ݙینھ اقوامِ متحدہ دی اُوں تاریخی قرارداد دی یاد ݙویندے جیں اچ عالمی امن دے قیام کیتے فلسطین دے ݙو ریاستی حل کوں ناگزیر قرار ݙتا ڳیا ہئی۔ تاں وی قرارداد دی موجودگی دے باوجود فلسطین خصوصاً غزہ اچ اسرائیلی بربریت اَتے جارحیت دا سلسلہ بدستور جاری اے۔عالمی اعداد و شمار موجب غزہ اچ جاری اسرائیلی دہشت گردی دے نتیجے اچ ہݨ تئیں 69 ہزار توں ودھ فلسطینی شہید تھی چُکن، جنہاں اچ 50 فیصد توں ودھ تریمتاں اَتے نِکے شامل ہِن۔ اسرائیلی حملیں اچ سینکڑاں ڈاکٹرز، صحافی اَتے وکلاء وی شہید تھی چُکن، جݙاں جو 170,965 فلسطینی شدید زخمی تھئے۔رپورٹاں موجب اسرائیلی فورسز غزہ اچ وݙے پیمانے تے ہزاراں ٹن دھماکہ خیز مواد استعمال کیتے جیں نال گھراں، رہائشی عمارتاں اَتے شہری تنصیبات کوں شدید نقصان پُڄے۔ مسلسل بمباری پاروں غزہ دے لکھاں بے گناہ شہری خوراک، ادویات اَتے صاف پاݨی دی قلت دا سامݨا کریندے پئن۔پاکستان ہمیشہ اقوامِ متحدہ دیاں قرارداداں موجب ہک آزاد فلسطینی ریاست دے حق اچ ݙو ٹوک موقف اختیار کیتے۔ وزیراعظم متعدد عالمی فورمز تے غزہ اچ جاری مظالم دے خلاف آواز چاتی، جݙاں جو چیف آف آرمی اسٹاف جنرل، فیلڈ مارشل سید عاصم منیر وی کئی موقع تے مظلوم فلسطینیاں دی حمایت کیتے بھرپور مؤقف اختیار کیتے۔پاکستان نہ صرف سفارتی سطح تے فلسطینی عوام دی حمایت کریندا رہیے بلکہ مُختلف ویلھے اچ وݙے پیمانے تے امدادی سامان بھیج تے مظلوم فلسطینی بھراواں دے نال عملی یکجہتی دا ثبوت وی ݙتے۔