حکومت پاور سیکٹر دی بحالی اَتے جدت کیتے وݙے پیمانے تے اصلاحات کریندی پئی اے، وفاقی وزیر توانائی اویس احمد خان لغاری

لاہور۔ 6 دسمبر (اے پی پی) وفاقی وزیر توانائی (پاور ڈویژن) سردار اویس احمد خان لغاری آکھیا جو پاکستان توانائی دے شعبے وِچ تکھی رفتار اصلاحات اَتے صاف توانائی دے ودھارے دے ذریعے خطے وِچ قائدانہ کردار ادا کریندا پئے۔ حکومت پاور سیکٹر دی بحالی اَتے جدت کیتے وݙے پیمانے تے اصلاحات کریندی پئی اے۔ اے ڳالھیں اُنہاں لاہور یونیورسٹی آف مینجمنٹ سائنسز (لمز) وِچ ݙُوجھی ایشیاء انرجی ٹرانزیشن سمٹ کوں زوم دے ذریعے خطاب کریندیں کیتیاں۔ وزیرِ توانائی آکھیا جو عالمی سطح تے توانائی دے سفارتی اَتے معاشی توازن تکھے بدلدے پئن، جیندے اثرات ترقی پذیر ملکاں خاص کر ایشیا تے گھاٹے ہِن۔ اُنہاں آکھیا جو ایشیا دنیا دی 48 فیصد توانائی دی کھپت دا مرکز اے جَݙاں جو عالمی آبادی دا 60 فیصد براعظم ایشیا وِچ رَہندے، جیندے نال اے خطہ عالمی انرجی ٹرانزیشن دا محور بݨ چُکیے۔ وزیرِ توانائی دا آکھݨ ہئی جو ایشیا وِچ قابلِ تجدید توانائی وِچ سرمایہ کاری گزریل ݙاہ سالاں وِچ 900 فیصد تئیں ودھ چُکی اے۔ پاکستان دے حوالے نال اُنہاں آکھیا جو مُلک دا کاربن اخراج عالمی سطح تے ہِک فیصد توں وی گھٹ اے، لیکن اے دنیا دے ݙاہ سَبھ توں ودھ ماحولیاتی خطرات نال ݙوچار ملکاں وِچ شامل اے۔ اُنہاں آکھیا جو پاکستان وِچ عوامی سطح تے تھیوݨ آلی سولر ریولوشن غیر معمولی رفتار نال اڳوں ودھی اے اَتے ہݨ تئیں 50 گیگا واٹ دے نیڑے سولر پینلز مُلک وِچ درآمد تھی چُکن۔ وزیرِ توانائی آکھیا جو پاکستان ایں ویلھے اپݨی 52 فیصد بجلی صاف اَتے قابلِ تجدید ذریعیں توں حاصل کریندا پئے، جَڈاں جو 2035ء تئیں ایں حصہ کوں 90 فیصد توں وَدھ تئیں گھِن ونڄݨ دا ہدف مقرر کیتا ڳئے ۔ اُنہاں آکھیا جو حکومت پاور سیکٹر دی بحالی اَتے جدت کیتے وݙے پیمانے تے اصلاحات کریندی پئی اے، جیندے وِچ ڈسکوز دی نجکاری، سمارٹ میٹرنگ، بجلی دی ترسیل دے نظام دی ڈیجیٹلائزیشن، سرکلر ڈیٹ وِچ کمی، 118 ہیلپ لائن دا قیام، نیشنل گرڈ دی تنظیمِ نو، زرعی ٹیوب ویلاں دی سولرائزیشن اَتے الیکٹرک وہیکل چارجنگ ٹیرف وِچ کمی جیھے اقدامات شامل ہِن۔ اُنہاں آکھیا جو پاکستان وِچ مقابلہ جاتی بجلی مارکیٹ نافذ تھی چُکی اے جیندے نال شفافیت، سرمایہ کاری اَتے مسابقت وِچ ودھکی تھیسی۔