پی ٹی آئی نال مذاکرات دا امکان مُک ڳئے، سینیٹر رانا ثناء اللہ

اسلام آباد۔ 6 دسمبر (اے پی پی) وزیراعظم دے مشیر سیاسی امور سینیٹر رانا ثناء اللہ آکھیا جو پی ٹی آئی نال مذاکرات دا امکان مُک ڳئے، فساد، تشدد یا انتہا پسند سوچ دی حمایت کرݨ آلے لوکاں نال کوئی ڳالھ مہاڑ نہ تھیسی۔ ہِک انٹرویو وِچ اُنہاں آکھیا جو اساݙی قومی خودمختاری اَتے وقار تے کوئی سمجھوتہ نی کیتا ونڄ سڳدا۔ اساں مذاکرات دا خیر مقدم کریندوں ، لیکن اساݙے فیصلے قومی مفادات اَتے بنیادی اقدار دے تحفظ دی لوڑھ توں پوری طرح رہنمائی حاصل کریندن۔ اُنہاں آکھیا جو پاکستان تحریک انصاف (پی ٹی آئی) معنی خیز مذاکرات دا اہم موقع ضائع کرݙتے۔ اُنہاں دا آکھݨ ہئی جو تشدد، افراتفری یا انتہا پسندانہ نظریات کھنڈاوݨ آلے لوکاں یا گروپاں نال مذاکرات برداشت نہ کیتے ویسن اَتے حکومت قومی استحکام دے تحفظ کیتے پُوری طرح پُرعزم اے۔ اُنہاں ݙسایا جو وزیراعظم شہباز شریف پارلیمنٹ وچ پی ٹی آئی کوں ڳالھ مہاڑ دی باضابطہ دعوت ݙتی ہئی اَتے وزیراعظم نہ تاں اُو پیشکش واپس گھِدی اے اَتے نہ ہی واپس گھِنݨ دا ارادہ رکھیندن۔ ہِک سوال دے جواب وِچ اُنہاں آکھیا جو حقیقی جمہوریت وِچ تعطل نی تھیندا، البتہ مذاکرات ہمیشہ صحیح رستہ ہوندن۔ اُنہاں آکھیا جو پی ٹی آئی دا موجودہ رویہ اَتے پروپیگنڈا ایں اصول دی خلاف ورزی اے اَتے اینکوں برداشت نی کیتا ونڄ سڳدا۔