مُلک وِچ ترقی اَتے خوشحالی دے نویں دور دا آغاز تھی چُکیے، شاندار کارکردگی تے اَڳلا الیکشن وی جِتسوں، محمد شہباز شریف

لاہور۔ 6 دسمبر (اے پی پی) وزیراعظم محمد شہباز شریف آکھیے جو مُلک وِچ ترقی اَتے خوشحالی دے نویں دور دا آغاز تھی چُکیے، شاندار کارکردگی تے اَڳلا الیکشن وی جِتسوں۔ مریم نواز پنجاب وِچ ترقی دے نویں باب رقم کریندی پئی اے، ماس ٹرانزٹ سسٹم نال گوجرانوالہ دے عوام دی تقدیر بدل ویسی۔ مُلک ترقی و استحکام وَل ٹُردا پئے، آوݨ آلے ݙینھاں وِچ مزید خوشخبری سݨائی ویسی۔ اے ڳالھیں اُنہاں گوجرانوالہ وِچ ماس ٹرانزٹ بس سروس دے سنگ بنیاد رکھݨ دے موقع تے تقریب توں خطاب کریندیں کیتیاں۔محمد شہباز شریف آکھیا جو پنجاب وِچ عوامی خدمت اَتے ترقی دا سفر 1985ء وِچ میݙے قائد اَتے وݙے بھرا محمد نواز شریف دی قیادت وِچ شروع تھیا، ایں دور وِچ صرف سیاست ہِک کریندی ہئی، ترقیاتی کماں دا پرے پرے تئیں کوئی نام و نشان نہ ہئی، محمد نواز شریف دی قیادت وِچ پنجاب وِچ پہلی واری تعمیری سیاست دا آغاز تھیا اَتے نواز شریف دے 3 سال دے دور وِچ تعمیری سیاست سازشی سیاست کوں ہمیشہ کیتے مِٹی وِچ دٻا ݙتا۔ ول قوم ݙٹھا جو پورے صوبے وِچ سڑکاں دے ڄال وچھائے ڳئے، ہسپتال، سکول، کالجز، یونیورسٹیاں اَتے ٻئے عوامی منصوبیں دی بنیاد رکھی ڳئی۔ وزیراعلیٰ مریم نواز اِیویں وژن کوں سامݨے رکھدیں اڄ عوامی خدمت دے ایں سفر کوں جاری رکھی کھڑی اے، جیندے تے میں اُنہاں کوں خراج تحسین اَتے مبارخ پیش کرینداں۔اُنہاں آکھیا جو مسلم لیگ (ن) دی سیاست عوامی خدمت اَتے ترقیاتی منصوبیں دی ہِک جیندی جاڳدی تصویر اے۔ وزیراعلیٰ پنجاب اڄ تہاݙے شہر گوجرانوالہ وِچ ماس ٹرانزٹ بس سروس منصوبے دا جیڑھا تحفہ ݙتے، ایں نال پورے ضلعے دی تقدیر بدل ویسی۔ پرے پرے علاقیں توں آوݨ آلے لوکاں، طالب علماں، مزدور طبقے اَتے ملازماں سودھے ہر شعبے نال تعلق رکھݨ آلے لوکاں کوں جدید اَتے شاندار سفری سہولتاں مِلسن۔محمد شہباز شریف آکھیا جو قائد محمد نواز شریف بطور وزیراعلیٰ اَتے ول بطور وزیراعظم جیڑھے شاندار کم کیتے، تاریخ اُنہاں کوں ہمیشہ سنہرے لفظاں وِچ یاد رکھیسی۔ محمد نواز شریف دا سَاریں توں وݙا کارنامہ پاکستان کوں ایٹمی قوت بݨاوݨ اے، اُنہاں مُلکی دفاع کوں نہ مُکݨ آلا بݨا تے کراچی توں گھِن تے پشاور تئیں ہر ݙُکھ محسوس کرݨ آلے پاکستانی دے دِل وِچ جاہ بݨائی اَتے ثابت کیتا جو اُو ہِک عظیم قائد ہِن۔ معرکہ حق وِچ شاندار کامیابی وی ایں ایٹمی قوت ہووݨ دے زور تے مِلی، جے پاکستان 1998ء وِچ ایٹمی دھماکے نہ کریندا تاں اڄ حالات ٻہوں وَکھ ہوندے۔اُنہاں مزید آکھیا جو قائد محمد نواز شریف ایں مُلک دی تقدیر بدلݨ کیتے جیڑھا خواب ݙٹھا اَتے جیڑھے جیڑھے ترقیاتی منصوبے شروع کیتے، اڄ الحمدللہ اُو خواب بݨاوݨ اَتے اُنہاں منصوبیں کوں پورا کرݨ کیتے پنجاب دی دھی مریم نواز ݙینھ رات کوشش کریندی پئی اے۔وزیراعظم آکھیا جو ایں عوامی خدمت دی وجہ نال ہی اڄوکے انتخابات وِچ شاندار کامیابی مِلی اے، انشاءاللہ عوامی خدمت دا اے سفر جاری رَہسی، میکوں یقین اے جو شاندار کارکردگی دی وجہ نال 3 سال بعد قائد محمد نواز شریف دی قیادت وِچ اَڳوں الیکشن وِچ وی اساں کامیابی حاصل کریسوں اَتے ایں مُلک کوں ہِک معاشی قوت بݨیسوں۔ایں توں پہلے، وزیراعلیٰ مریم نواز خطاب کریندیں آکھیا جو اساکوں عوام دی خدمت کرݨ دا مینڈیٹ مِلیے، جِیندی تکمیل کیتے ہر ممکن کوشش کریندے پیوں، گوجرانوالہ وِچ ماس ٹرانزٹ بس سروس وی ایں سلسلے دی ہِک کڑی اے جیندے تے میں گوجرانوالہ دے عوام کوں مبارخ پیش کریندی آں۔