پی ٹی آئی دا فوج دے خلاف زبان استعمال کرݨ پاکستان دشمنی اے، خواجہ محمد آصف

سیالکوٹ۔ 6 دسمبر(اے پی پی) وفاقی وزیردفاع خواجہ محمد آصف آکھیے جو پی ٹی آئی دی قیادت اَتے اُوندے ٻاہرلے مُلک عناصر گندی زبان استعمال کریندیں مُلکی فوجاں اَتے شہیداں دی قربانیاں کوں نذر انداز کریندے پئن۔ سیالکوٹ وِچ میڈیا نال ڳالھ مہاڑ کریندیں اُنہاں آکھیا جوعام انتخابات دے بعد پاکستان تحریکِ انصاف دی قیادت اَتے عہدیداراں جیڑھا رویہ اپنائے، اُو سیاسی شائستگی دے خلاف اے۔ اُنہاں آکھیا جو پی ٹی آئی دے کجھ رہنما اَتے عہدیدار سوشل میڈیا تے کھلے عام ننگے ڳالھیں مندے کڈھیندے پئن۔ وزیر دفاع آکھیا جو پی ٹی آئی دی موجودہ قیادت، جَیڑھی جیل توں ٻاہر ہووے، پارلیمنٹ وِچ ہووے یا ٻاہر، ساریاں دا ڳالھ کرݨ دا انداز ہِکو جیہا غیر شائستہ اے۔ پی ٹی آئی دے اُو عناصر جیڑھے ٻاہرلے مُلک بَیٹھن، اُو وی ٻہوں تِکھی اَتے غیر ذمہ دارانہ زبان استعمال کریندن۔ اگرچہ اُو اے دعویٰ کریندن جو اُو پی ٹی آئی دے نال کائنی ، پر عملی طور تے ݙوہیں ہِکو جیہا بیانیہ اَتے اُوہا گندی زبان ودھیندن۔خواجہ محمد آصف آکھیا جو جے افراد اَتے اداریں بارے اِیں قسم دی زبان استعمال کیتی ونڄے تاں ردِعمل آوݨ ہِک قدرتی ڳالھ اے۔ اُنہاں آکھیا جو اے لوک اقتدار وِچ وی ایہو جیہا کَم کریندے رہین۔ اُنہاں دا لیڈر ٻئے لوکاں دی توہین کیتے بوچھݨ پَا تے نقل کریندا ہئی ، اُو محمود خان اچکزئی دی نقل لہیندا ہئی جیڑھا اڄ اُنہاں دے نال کَھڑے۔ تریمتاں متعلق نامناسب زبان دا استعمال وی اِنہاں دی گزریل سیاست دا حصہ رہیے۔خواجہ محمد آصف آکھیا جے ڈی جی آئی ایس پی آر ایں رویے تے کوئی ردِعمل ݙتے، تاں اُو ٻہوں مناسب اَتے متوازن اے۔ اُنہاں آکھیا جو میں بے شمار شہیداں دے جنازیں وِچ شامل تھیاں، اُنہاں دے گھراں وِچ وی ڳیاں، وزیرِاعظم دے نال وی لواحقین نال ملاقاتاں کیتن، لیکن میکوں کݙاہیں پی ٹی آئی دا کوئی رہنما کہیں شہید دے جنازے وِچ نظر نی آیا۔ وزیر دفاع آکھیا جو پی ٹی آئی کوں چاہیدےجو اُو شہیداں دے جنازیں وِچ ونڄے، اپݨے مجاہدین اَتے شہیداں دے حق وِچ آواز چاوے، دہشت گرداں دا بیانیہ نہ اپناوے، طالبان دے حق وِچ نرمی نہ ݙکھاوے اَتے اُنہاں نال محبت اَتے رعایت دیاں ڳالھیں نہ کرے۔ جَݙاں ہِک جماعت دہشت گرداں دی حمایت اَتے اپݨی فوج دے خلاف زبان استعمال کریسی تاں ول ردِعمل پیدا تھیوݨ لازمی اے۔اُنہاں آکھیا جو جنہاں لوکاں دی زبان اَتے کردار ایں درجے تئیں ڈھہہ چُکیا ہووے جو ہِک شہید وی محفوظ نہ رَہوے، اُنہاں توں شائستگی اَتے ذمہ واری دی توقع نی رکھی ونڄ سڳدی۔ اُنہاں آکھیا جو پی ٹی آئی دی سنڄاݨ پاکستان دشمناں دی سنڄاݨ اے۔ سیاست کرݨی اے تاں کرو، احتجاج کرݨا اے تاں کرو، مگر پاکستان دی زمین، غیرت اَتے حمیت کوں للکارݨ دی ہمت نہ کرو۔ خواجہ محمد آصف آکھیا جو اے پاکستانیت نی بلکہ پاکستان دشمنی اے اَتے اساں ایں تے کݙاہیں چپ نہ رَہسوں۔