سپیکر قومی اسمبلی سردار ایاز صادق دا قلات وِچ 12 بھارتی سپانسرڈ دہشت گرداں کوں جہنم واصل کرݨ تے سکیورٹی فورسز کوں خراج تحسین

اسلام آباد۔ 7 دسمبر (اے پی پی) سپیکر قومی اسمبلی سردار ایاز صادق بلوچستان دے ضلع قلات وِچ 12 بھارتی سپانسرڈ دہشت گرداں کوں جہنم واصل کرݨ تے سکیورٹی فورسز کوں خراجِ تحسین پیش کریندیں آکھیے جو پاک فوج اَتے قانون نافذ کرݨ آلے اداریں دیاں بھارتی سپانسرڈ دہشت گرداں دے خلاف بھرپور کارروائیاں تعریف دے قابل ہِن، قوم اپݨی سکیورٹی فورسز دی قربانیاں اَتے مضبوط عزم تے فخر کریندی اے۔ جاری بیان وِچ سپیکر سردار ایاز صادق آکھیا جو ٻاہرلی سازش دے ذریعے تھیوݨ آلی دہشت گردی کوں منڈھ توں پٹݨ کیتے پُوری قوم ہِک مُٹھ اے، قومی ایکشن پلان دے تحت سکیورٹی فورسز دیاں بھرپور کارروائیاں مُلکی استحکام دی ضمانت ہِن، دہشت گردی دے مُکمل خاتمے کیتے پُوری قوم سکیورٹی فورسز دے نال کَھڑی اے۔ سپیکر سردار ایاز صادق دہشت گرداں دے خلاف آپریشنز وِچ حصہ گھِنݨ آلے جواناں دی جرات اَتے بہادری کوں خراج تحسین پیش کریندیں آکھیا جو بھارتی سپانسرڈ دہشت گرداں دے خاتمے کیتے سکیورٹی فورسز دیاں جاری کارروائیاں تعریف دے قابل ہِن۔