انڈونیشیا دے صدر پرابووو سوبیانتو پاکستان دے 2 ݙینہہ دے دورے تے اسلام آباد پڄ ڳئن

اسلام آباد۔ 8 دسمبر(اے پی پی)انڈونیشیا دے صدر پرابووو سوبیانتو پاکستان دے 2 ݙینہہ دے دورے تے اسلام آباد پڄ ڳئن۔ صدر مملکت آصف علی زرداری اتے وزیر اعظم شہباز شریف نورخان ایئربیس تے انہاں دا استقبال کیتے، وفاقی کابینہ دے ارکان اتے ٻئے حکام وی انڈونیشیا دے صدر دے استقبال کیتے موجود ہن۔ انڈونیشیا دے صدر جہاز توں ٻاہرو آئن تاں صدر مملکت آصف علی زرداری اتے وزیر اعظم محمد شہباز شریف انہاں دا پرجوش استوبال کیتے اتے ہتھ ملائے۔ پریتی لباس اچ ملبوس ٻالاں انڈونیشیا دے صدر پرابووو سوبیانتو کوں پھُل پیش کیتے۔

ایں موقع تے انڈونیشیا دے صدر دا صدر مملکت اتے وزیر اعظم نال خوشگوار جملیاں دا تبادلہ تھیا۔ ݙوہاں ملکاں دے پرچم چاتے ٻالاں معزز مہماناں کوں خوش آمدید آکھیا۔ انڈونیشیا دے صدر کوں 21 توپاں دی سلامی وی ݙتی گئی۔

انڈونیشیا دے صدر کوں وزیر اعظم محمد شہباز شریف دورے دی دعوت ݙتی ہئی۔ صدر پرابووو سوبیانتو دا پاکستان دا اے پہلا دورہ اے ۔ انڈونیشیا توں آخری صدارتی دورہ 2018 اچ صدر جوکو ویدودو کیتا ہئی۔ اے دورہ اودھ اہمیت رکھیندے جو ایں سال پاکستان اتے انڈونیشیا وچال سفارتی تعلقات دے قیام دی 75ویں سالگرہ منائی ویندی پئی اے۔ صدر پرابووو سوبیانتو وزیر اعظم نال وفداں دی سطح تے مذاکرات کریسن اتے صدرِ مملکت آصف علی زرداری نال وی ملاقات کریسن۔ دورے اچ ݙوہیں ملک تجارت، سرمایہ کاری، دفاع، صحت، آئی ٹی، موسمیاتی تبدیلی، تعلیم، ثقافت سودھا مختلف شعبیاں اچ تعاون ودھاوݨ اتے علاقائی و عالمی سطح تے شراکت داری کوں مزید مضبوط بݨاوݨ تے جامع ڳالھ مہاڑ کریسن