پاکستان سارک چارٹر دے اصولاں اَتے مقاصد کیتے پُرعزم اے،وزیراعظم

اسلام آباد۔ 7 دسمبر(اے پی پی)وزیراعظم شہباز شریف سارک (سائوتھ ایشین ایسوسی ایشن فار ریجنل کوآپریشن) دے چارٹر ݙینھ دی 40 ویں سالگنڈھ تے سارے رُکن ملکاں دیاں حکومتاں اَتے عوام کوں دلی مبارک ݙیندے آکھیے جو اے خُوشی آلا موقع اساکوں جنوبی ایشیا اچ امن، ترقی اَتے خوشحالی دے سانجھے عزم دی یاد ݙویندے۔ وزیراعظم محمد شہباز شریف اے ڳالھ سارک چارٹر ݙینھ دی 40 ویں سالگنڈھ سانڳے اپݨے سنیہے اچ آکھی جو چالھی سال پہلے جݙاں سارک دی بنیاد رکھی ڳئی ہائی تاں اِیندا مقصد اے ہا جو سارک ملکاں وچال ڳالھ مہاڑ کوں ودھایا ونڄے، تعاون کوں مضبوط کیتا ونڄے اَتے تعلقات اینجھے مضبوط تھیون جو اساکوں ہِک ݙُوجھے دے مزید نیڑے گھِن آوݨ، ٻھل بدقسمتی نال علاقائی، سیاسی وجوہات پاروں اے مقاصد مُکمل طور تے حاصل نی تھی سڳے، تاں وی میں سارک سیکرٹریٹ دیاں کوششاں کوں خراج تحسین پیش کرینداں جو اُنہاں تنظیم دے ہدف ودھاوݨ اَتے رُکن ملکاں وچال معنی خیز تعاون دے موقع پیدا کرݨ کیتے پورا ہتھ ونݙائے۔ خطے اچ ودھدے علاقائی تعاون سانڳے، جنوبی ایشیا اچ اقتصادی، ڈیجیٹل اَتے عوامی رابطیاں دی اہمیت پہلے توں وَدھ چُکی اے۔ ساکوں رَل مِل تے اینڄھے رابطیاں کوں طاقت ݙیوݨی ہوسی جیڑھے تجارت، سرمایہ کاری، جدت اَتے ثقافتی تبادلے کوں ودھاوݨ۔وزیراعظم شہباز شریف آکھیا جو اساݙا خطہ غریبی، موسمیاتی تبدیلی نال پیدا تھیوݨ آلیاں آفتاں، غذائی و توانائی دے عدم تحفظ اَتے صحت عامہ جھیئں سانجھے چیلنجز دا سامݨا کریندا پئے، انہاں دا حل سانجھے اعتماد، چنڳی نیت اَتے تعاون دی روح نال اجتماعی کوششاں نال ہی ممکن اے، صرف سانجھے اقدام نال ہی اساں اپݨے عوام کیتے ہِک مضبوط اَتے جامع مستقبل بݨا سڳدے ہیں۔ وزیراعظم آکھیا جو پاکستان سارک چارٹر دے اصولاں اَتے مقاصد کیتے پُرعزم اے جو اینڄھے حقیقی تعاون جیڑھے خودمختار برابری، سانجھے احترام اَتے مثبت رابطیاں دی بنیاد تے ہوون، جنوبی ایشیا دیاں ودھ صلاحیتاں کوں استعمال کریندے اساں ساریاں کیتے بہتر مستقبل دی ضمانت بݨ سڳدے ہیں۔ وزیراعظم آکھیا جو اڄ اساں اپݨے عزم دی تجدید کریندے ہیں جو اساں ہِک پُرامن، مستحکم اَتے خوشحال جنوبی ایشیا بݨاوݨ کیتے رَل مِل تے کَم کریسوں۔