چیف آف ݙیفنس فورسز فیلڈ مارشل سید عاصم منیر کوں تریے مسلح افواج دا گارڈ آف آنر، مسلح افواج کوں جنگ دے نویں تقاضیاں نال جڑݨا ہوسی، فیلڈ مارشل سید عاصم منیر

راولپنڈی۔ 8 دسمبر(اے پی پی)چیف آف ݙیفنس فورسز اَتے چیف آف آرمی سٹاف فیلڈ مارشل سید عاصم منیر کوں تریے مسلح افواج ولوں پاک فوج دے جنرل ہیڈ کوارٹرز (جی ایچ کیو) اچ گارد آف آنر پیش کیتا ڳیا۔ تقریب اچ چیف آف نیول سٹاف ایڈمرل نوید اشرف (نشان امتیاز)، چیف آف ایئر سٹاف ایئر چیف مارشل ظہیر احمد بابر سدھو اَتے تریے مسلح افواج دے اعلیٰ افسراں شرکت کیتی۔ آئی ایس پی آر دے مطابق، چیف آف آرمی سٹاف اَتے چیف آف ݙیفنس فورسز تریے مسلح افواج دے افسراں کوں خطاب کریندے پوری پاکستانی قوم دے غیر معمولی حوصلے اَتے عزم بالخصوص “معرکہ حق” اچ پاکستان دیاں مسلح افواج دے بہادر جواناں اَتے تریمتیں دی پیشہ ورانہ مہارت کوں ھک واری ولا پکا کیتا۔ انہاں ایں ڳالھ تے زور ݙتا جو “معرکہ حق” دے ملٹی ݙومین آپریشنز ہݨ مستقبل دیاں جنگاں کیتے ھک نصابی مثال اَتے کیس سٹڈی دی حیثیت اختیار کر ڳئن۔ انہاں، انہاں شہیداں کوں وݙا خراج عقیدت پیش کیتا جیڑھے ہمیشہ قوم دا ماݨ رہسن۔

تریے مسلح افواج وچال جوڑ، ربط اتے ہم آہنگی کیتے ھک باضابطہ انتظام دی لوڑھ تے زور ݙیندے ہوئیں، انہاں واضح کیتا جو مسلح افواج کوں جنگ دے انہاں نویں تقاضیاں نال ہم آہنگ رہݨا ہوسی جیڑھے ہݨ سائبر سپیس، الیکٹرو میگنیٹک سپیکٹرم، خلائی حداں، انفارمیشن آپریشنز، مصنوعی ذہانت اَتے کوانٹم کمپیوٹنگ ڄھیاں اُبھردیاں ہوئیاں ٹیکنالوجیز دیاں وݙیاں قسماں تئیں وڳھر ڳئن۔ انہاں نویں بݨائی ڳئی سی ݙی ایف ہیڈکوارٹرز کوں تاریخی قرار ݙتا جیڑھا مستقبل دے خطرات نال نبݨݨ کیتے تریے مسلح افواج دے سانجھے پلیٹ فارم دے تحت مطلوبہ جوڑ، ربط اَتے ہم آہنگی مہیا کریسی۔ انہاں مسلح افواج کیتے اپݨا وژن ݙسیندے آکھیا جو اساکوں ھک ثقافتی طور تے مستقبل کوں ݙیکھݨ آلی اَتے ہر ویلھے تیار جنگی قوت بݨݨے جیڑھی جارحیت کوں روکݨ دی صلاحیت رکھیندی ہووے اَتے جیکوں قوم دا پورا اعتماد حاصل ہووے۔

تقریب دے آخر اچ پاکستان نیوی اَتے پاکستان ایئر فورس دے “معرکہ حق” دے غازیاں اَتے ہیروز کوں جنگ دے دوران انہاں دی شجاعت اَتے بہادری دے اعتراف اچ اعزازات نال نوازیا ڳیا۔