مالی بدعنوانی دے خلاف ٹھوس اقدامات حکومت دی ترجیح، وزیراعظم محمد دا انسداد بدعنوانی دے عالمی ݙینھ تے سنیہا

اسلام آباد۔ 9 دسمبر(اے پی پی)وزیر اعظم محمد شہباز شریف بدعنوانی مکاوݨ کیتے حکومتی اقدامات کوں مزید مؤثر بݨاوݨ دا عزم دوہریندے آکھیے جو مالی بدعنوانی دے خلاف ٹھوس اقدامات چاوݨ حکومت دیاں ترجیحات اچ شامل اے۔ 9 دسمبر کوں انسداد بدعنوانی دے عالمی ݙینھ٘ہ تے آپݨے سنیہے اچ وزیر اعظم آکھیے جو اڄ پاکستان اقوام عالم نال ھک آواز تھی تے انسداد بدعنوانی دے عالمی ݙینھ تے بدعنوانی کوں ختم کرݨ کیتے جاری اقدامات کوں مزید مؤثر بݨاوݨ دا عزم دوہریندے۔ وزیر اعظم آکھیا جو 2025 اچ اے ݙینھ “نوجواناں نال رل تے بدعنوانی دے خلاف: ایماندار، باعزت مستقبل دی بنیاد” دے عنوان نال منایا ویندا پئے، اے عنوان ہر جہت اَتے ہر عمر دی آبادی کوں شامل کریندے ہوئیں ایں برائی کوں مکاوݨ دی اہمیت کوں اڳونہا کریندے۔ وزیر اعظم آکھیا جو نوجوان اساݙا قیمتی اثاثہ اَتے پُر امن، خوشحال اَتے ترقی یافتہ مستقبل دی ضمانت ہِن۔ نویں دور اچ بدعنوانی دی نوعیت اَتے طریقہ کار تکھے نال بدلدا پئے، ایں سانڳے نوجواناں دی اوندے سدِ باب اچ شمولیت نال ایں ناسُور کوں مؤثر انداز وچ ختم کیتا ونڄ سڳدے۔ انہاں آکھیا جو مالی بدعنوانی ملکی ترقی، معاشرتی تنوع اَتے معیشت دیاں بنیاداں کوں کمزور کریندی اے اَتے عوامی اعتماد کوں ٹھیس پُڄیندی اے۔ انسداد بدعنوانی دا عالمی ݙینھ دنیا بھر دے لوکاں کوں اے موقع وی ݙیندے جو او بدعنوانی دے مضر معاشرتی اثرات دی حوصلہ شکنی اَتے بدعنوانی توں پاک معاشرہ بݨاوݨ دے آپݨے عزم دی تجدید کرن۔ وزیر اعظم آکھیا جو مالی بدعنوانی نہ صرف ملکی انتظامیہ کوں کمزور کریندی اے بلکہ عوام دی روز مرہ زندگی، معاشرتی انصاف و مساوات، معاشی ترقی اَتے فلاحی ریاست دے بنیادی اصولاں کوں وی متاثر کریندی اے۔ انہاں مالی بدعنوانی دے خلاف ٹھوس اقدامات چاوݨ کوں حکومت دی ترجیح قرار ݙیندے آکھیا جو ایں سانڳے قومی احتساب بیورو (نیب) اَتے سارے متعلقہ ادارے بھرپور طریقے نال اَتے وݙی محنت نال کارروائی کریندے پئن تاں جو انتظامی، مالیاتی اَتے ادارہ جاتی سودھا ہر سطح تے جوابدہی کوں یقینی بݨایا ونڄ سڳے۔ انہاں مالی بدعنوانی دے خلاف قانونی کارروائیاں اَتے قومی وسائل دے تحفظ کیتے نیب دیاں کوششاں دی تعریف کریندے ہوئیں نوجوان نسل اچ انسداد بدعنوانی دی آگاہی پیدا کرݨ کیتے وی نیب دیاں کوششاں دی تعریف کیتی۔ وزیر اعظم آکھیا جو منظم مالی جرائم پاروں آپݨی رقم توں محروم تھیوݨ آلے شہریاں دی ویلھے سر داد رسی نال وی نیب تے عوام دا اعتماد مزید پکا تھئے۔ انہاں آکھیا جو عالمی سطح تے وی پاکستان ایں معاشرتی برائی دے خاتمے کیتے مؤثر سانجھے داری کریندا پئے۔ پاکستان دا اقوام متحدہ دے کنونشن برائے انسداد بدعنوانی دے تحت مختلف ملکاں نال تعاون اَتے باہمی قانونی معاونت دیاں مفاہمتی یادداشتاں تے دستخط کرݨ عالم سانجھے داری دا حصہ اے۔ انہاں آکھیا جو اڄ انسداد بدعنوانی دے عالمی ݙینھ تے تجدید عہد کریندے ہیں جو اساں یکجہتی، سانجھے مقصد اَتے شفاف، منصفانہ اَتے خوشحال پاکستان دے خواب دی تکمیل اچ ہر ممکن اقدامات کریسوں اَتے وفاقی، صوبائی حکومتاں سودھا پورے معاشرے دی سطح تے ہر طبقے اَتے رہنماواں کوں شامل کریندے ہوئیں اوندے خلاف جدوجہد کوں مزید مؤثر انداز اچ جاری رکھیا ویسی۔