پاکستان پولیو مکاوݨ کیتے آندے چار سالاں اچ 639.54 ملین ڈالر مختص رکھیسی، وفاقی وزیر احسن اقبال

ابوظہبی۔ 9 دسمبر (اے پی پی)وفاقی وزیر برائے منصوبہ بندی، ترقی و خصوصی اقدامات پروفیسر احسن اقبال آکھیے جو پاکستان حکومت پولیو دے خاتمے کوں قومی ترجیح سمجھدی اے اَتے ایں سانڳے آوݨ آلے چار سال اچ 639.54 ملین ڈالر مختص کیتے ویسن تاں جو آوݨ آلی نسلاں کیتے پولیو فری پاکستان یقینی بݨایا ونڄ سگے۔ انہاں ابوظہبی اچ پولیو دے خاتمے کیتے ہائی لیول پلیجنگ موومنٹ اچ پاکستان دی نمائندگی کیتی۔ اے تقریب متحدہ عرب امارات دی حکومت ولوں محمد بن زید فاؤنڈیشن فار ہیومینیٹی اَتے گلوبل پولیو ایریڈیکیشن انیشیٹو (GPEI) دے ڳانݙھے نال کیتی گئی۔ وفاقی وزیر متحدہ عرب امارات دے صدر شیخ محمد بن زید النہیان دی لکھاں ٻالاں کوں پولیو توں محفوظ بݨاوݨ دی مسلسل کوششاں اَتے پاکستان نال اعتماد، انسانیت اَتے سانجھے مقاصد دی بنیاد تے قائم مضبوط شراکت داری تے شکریہ ادا کیتے۔ وفاقی وزیر زور ݙتے جو پاکستان اچ پولیو دا خاتمہ آوݨ آلی نسلاں کیتے اخلاقی ذمہ داری اَتے قومی فریضہ اے، پاکستان ایں فرض کوں یکجہتی، عزم اَتے قومی ارادے نال پورا کریندا پئے۔ انہاں آکھیا جو پاکستان اچ وائرس دا پھیلاؤ کئی ڈھاکیاں دی گھٹ ترین سطح تے اے، ویکسی نیشن دے معیار اچ مسلسل بہتری آندی پئی اے، نگرانی دا نظام مضبوط اے اَتے کمیونٹی دا اعتماد وی ٻیا ودھدا پئے۔ احسن اقبال آکھیا جو پاکستان آوݨ آلے چار سال اچ639.54 ملین ڈالر مختص کرݨ دا عہد کریندے تاں جو ہک پولیو فری مستقبل کوں یقینی بݨایا ونڄے۔