وزیراعظم دا مالیاتی بدعنوانی مکاوݨ دے اقدامات ٻئے منظم کرݨ دا عزم

اسلام آباد۔ 9 دسمبر(اے پی پی)وزیراعظم محمد شہباز شریف مالیاتی بدعنوانی مکاوݨ کیتے اقدامات ودھ منظم کرݨ دا عزم دوہریندے آکھیے جو نیب کوں اپݨا کم شفافیت نال جاری رکھݨ دی مکمل ادارہ جاتی آزادی ݙتی اے، وفاقی حکومت نیب دے ہتھوں سیاسی انتقام تے یقین نئیں رکھدی۔انہان اے ڳالھ وزیراعظم ہاؤس اسلام آباد اچ عالمی انسداد بدعنوانی بارے تقریب نال خطاب اچ آکھی۔ وزیراعظم قومی احتساب بیورو (نیب) ولوں مالی بدعنوانی مکاوݨ کیتے کوششاں اَتے غیر معمولی کامیاب کارروائیاں تے لیفٹیننٹ جنرل (ر) نذیر احمد اَتے ساری ٹیم کوں خراج تحسین پیش کیتے۔ انہاں آکھیا جو پاکستان انسداد بدعنوانی دے عالمی ݙینھ تے اے عزم ودھیندے ہیں جو مالیاتی بدعنوانی کوں ختم کرݨ کیتے اقدامات کوں مزید منظم انداز اچ جاری رکھیا ویسی، 2025ء اچ اے ݙینھ “نوجواناں دے نال رَل تے بدعنوانی دے خلاف: ایماندار با عزت مستقبل دی بنیاد” دے عنوان نال منایا ویندا پئے، جیڑھا پاکستان دی نوجوان آبادی کوں ایں چنڳے کم اچ رلاوݨ دی اہمیت ودھیندے۔ انہاں آکھیا جو مالی بدعنوانی توں پاک معاشرہ ہی ملکی ترقی، خوشحالی اَتے معیشت دی مضبوطی اَتے عوامی اعتماد یقینی ٻݨیندے۔ وزیراعظم آکھیا جو سارے حکومتی منصوبیاں اَتے اقدامات اچ مالی، انتظامی اَتے ادارہ جاتی شفافیت حکومت دیاں ترجیحات ہین جیندے کیتے ودھ اقدامات کیتے ویندے پئن، ایں سانڳے قومی احتساب بیورو (نیب) اَتے سارے متعلقہ ادارے ودھ تے کم کریندے پئن تاں جو ہر سطح تے جوابدہی یقینی ٻݨائی ونڄے۔ چیئرمین نیب لیفٹیننٹ جنرل (ر) نذیر احمد آکھیا جو سارے متعلقہ ریاستی اداریاں دے نال باہمی اَتے موثر تعاون نال نیب 2025ء اچ 5.1 ٹریلین روپے توں ودھ مالیت دے اثاثیاں دیاں غیر معمولی وصولیاں ممکن ٻݨائن۔ چیئرمین نیب آکھیا جو انسداد بدعنوانی دے عالمی ݙینھ دی تقریب وزیراعظم ہاؤس اچ تھیوݨ ایں ڳالھ دی عکاسی کریندی اے جو احتساب اَتے جوابدہی حکومت کیتے ودھ اہمیت رکھدن۔