انڈونیشیا دے صدر پرابووو سوبیانتو دا دورہ پاکستان کامیابی نال مکمل، وطن واپس روانہ

اسلام آباد۔ 10 دسمبر (اے پی پی) وزیراعظم دے معاون خصوصی صنعت و پیداوار ہارون اختر خان اسلام آباد انٹرنیشنل ایئرپورٹ تے انڈونیشیا دے صدر پرابووو سوبیانتو کوں الوداع کیتے۔وزارت صنعت و پیداوار توں جاری بیان موجب دورہ پاکستان دے دوران صدر پرابووو سوبیانتو صدر مملکت آصف علی زرداری، وزیراعظم محمد شہباز شریف اَتے چیف آف ڈیفنس فورسز و آرمی چیف فیلڈ مارشل سید عاصم منیر نال انڄ انڄ ملاقاتاں کیتیاں جنہاں اچ ݙوطرفہ تعلقات، خطے دی صورتحال اَتے مستقبل دے تعاون دے مختلف پہلواں تے ڳالھ مہاڑ کیتی ڳئی ۔ اسلام آباد وچ منعقدہ پروقار تقریب اچ صدر مملکت آصف علی زرداری انڈونیشیا دے صدر پرابووو سوبیانتو کوں پاکستان دے اعلیٰ ترین سول اعزاز ’’نشانِ پاکستان‘‘ نال نوازیا جیڑھا ݙوہیں ملکاں دی پراݨی شراکت داری اَتے سانجھے اعتماد دا اظہار اے۔ دورے دے دوران پاکستان اَتے انڈونیشیا تجارت اَتے ٹیکنالوجی دے شعبیں اچ تعاون کوں ودھاوݨ تے اتفاق کیتے۔ ایں سلسلے اچ مختلف معاہدیں اَتے مفاہمتی یاداشتاں (ایم او یوز) تے وی دستخط تھئن، جیڑھے مستقبل اچ ݙوہیں ملکاں دے تعلقات کوں مزید مضبوط بݨاوݨ وچ اہم سنگِ میل ثابت تھیسن۔ حکومتِ پاکستان انڈونیشیا دے صدر دے کامیاب دورہ پاکستان کوں ݙوطرفہ تعاون وچ پیش رفت دا ہک اہم قدم قرار ݙتے۔