سرکاری ادارے، سول سوسائٹی، میڈیا، غیر سرکاری تنظیماں اَتے شہری ملک اچ انسانی حقوق دے تحفظ اَتے ودھارے اچ اپݨا کردار ادا کرن، صدرِ مملکت آصف علی زرداری دا انسانی حقوق دے بین الاقوامی ݙینھ تے سنیہا

اسلام آباد۔ 10 دسمبر(اے پی پی)صدرِ مملکت آصف علی زرداری سرکاری اداریاں، سول سوسائٹی، میڈیا، غیر سرکاری تنظیماں اَتے شہریاں تے زور ݙتے جو او ملک اچ انسانی حقوق دے تحفظ اَتے ودھارے اچ اپݨا کردار ادا کرن۔ صدرِ مملکت انسانی حقوق دے بین الاقوامی ݙینھ دے موقع تے اپݨے سنیہے اچ آکھیے جو اساں ایں ضرورت کوں تسلیم کریندے ہیں جو کمزور اَتے پسماندہ طبقیاں تے خصوصی توجہ ݙتی ونڄے اَتے انہاں دے حقوق دے تحفظ کیتے قانونی، معاشی اَتے سماجی ڈھانچے کوں مزید مضبوط بݨایا ونجے، اساں ہر فرد دی عزت، مساوات اَتے انصاف دے تحفظ دے عزم دی تجدید کریندے ہیں، بھاویں اوںدا تعلق کہیں وی نسل، مذہب، جنس، زبان یا سماجی حیثیت نال ہووے، اساں سارے انسانی حقوق دے ودھارے اَتے تحفظ کیتے کوششاں جاری رکھوں۔ ساکوں احترام، برداشت اَتے باہمی وقار دا اینڄھا ماحول پیدا کرݨا ہوسی جتھاں ہر فرد خود کوں محفوظ اَتے بااختیار محسوس کرے۔ صدر آصف علی زرداری آکھیا جو قائداعظم محمد علی جناح دے وژن دا احترام کرݨ اَتے ہک زیادہ جامع معاشرہ تشکیل ݙیوݨ ساݙی سانجھی ذمہ داری اے۔ صدرِ مملکت دعا کیتی اے جو اے ݙینھ ساکوں بطور قوم اَتے بطور عالمی برادری ایں ڳالھ دو ولا ڳھن ونڄے جو اساں ہمیشہ انسانی حقوق دی بالادستی کوں برقرار رکھوں۔ انہاں آکھیا جو الّلہ تعالیٰ ساکوں کمزور اَتے پسماندہ طبقیاں دے تحفظ دی کوشش اچ کامیابی عطا فرماوے