حکومت شہریاں کوں بنیادی حقوق ݙیوݨ اَتے ریاستی اداریاں کوں مضبوط بݨاوݨ کیتے ردھی ہوئی اے، وزیراعظم دا انسانی حقوق دے عالمی ݙینھ تے سنیہا

اسلام آباد۔ 10 دسمبر(اے پی پی)وزیراعظم محمد شہباز شریف بنیادی انسانی حقوق بالخصوص انسانی عزت و تکریم، برابری اَتے آزادی دے تحفظ کیتے قومی عزم دوہریندے آکھیے جو پاکستان نہ صرف انسانی حقوق دے معاملے اچ بین الاقوامی معاہدیاں دی پاسداری کریندے ٻھل بنیادی اسلامی تعلیمات سانڳے وی سارے انسانی حقوق کوں مقدم رکھدے۔ اے ڳالھ انہاں (اڄ) ٻدھ کوں انسانی حقوق دے عالمی ݙینھ تے اپݨے سنیہے اچ آکھی۔ وزیراعظم آکھیا جو ہر سال 10 دسمبر کوں منایا ونجݨ آلا انسانی حقوق دا عالمی ݙینھ 1948 اچ اقوام متحدہ ولوں منظور کیتے ونجݨ آلے تاریخی اعلامیہ برائے حقوق انسانی دی یاد تازہ کریندے جیڑھا ہک اینڄھا سنگ میل اے جئیں پوری انسانیت کیتے عزت، آزادی، برابری اَتے انصاف دے تحفظ دی جدوجہد دا نواں باب لکھیے۔ وزیراعظم آکھیا جو پاکستان انسانی حقوق دے تحفظ، فروغ اَتے موثر نفاذ کیتے پرعزم اے۔ حکومت ریاستی اداریاں کوں مضبوط بݨاوݨ کیتے کوشاں اے تاں جو سماجی تحفظ، صنفی برابری، بالاں، تریمتاں، اقلیتاں، خصوصی افراد اَتے معاشرے دے کمزور طبقیاں دے حقوق دے موثر تحفظ کوں یقینی بݨایا ونڄ سگے۔ ساݙا مقصد ہک اینڄھا معاشرہ ݙیوݨ اے جتھاں کوئی شہری وی پِچھو نہ رہ ونڄے