سرحداں دے محافظاں سانڳے مخالفاں دی زبان استعمال کیتی ڳئی، سپیکر قومی اسمبلی

اسلام آباد۔ 10 دسمبر(اے پی پی) سپیکر قومی اسمبلی سردار ایاز صادق آکھیے جو سرحداں دے محافظاں کیتے مخالفاں دی زبان استعمال کیتی ڳئی اے، وزیراعظم محمد شہباز شریف اَتے مَیں ٻہوں واری آکھ چُکیوں جو مذاکرات کیتے دروازے کُھلئن۔پارلیمنٹ ہاؤس اچ ذرائع ابلاغ دے نمائندیں نال ڳالھ مہاڑ کریندے انہاں آکھیا جو مَیں اَتے وزیراعظم ٻہوں واری اپوزیشن کوں آکھیے جو مذاکرات کیتے دروازے کُھلئن جیں دے جواب اچ اے آکھیا ڳیا جو اساں آرمی چیف فیلڈ مارشل نال ڳالھ مہاڑ کرݨ چاہندوں۔انہاں آکھیا جو جیں فوج بھارت نال جنگ جِتی ہئی اوں دے خلاف ہی زبان استعمال کیتی ڳئی اے، پارلیمنٹ دے فلور کوں عدلیہ مخالف زبان کیتے استعمال کیا ڳیا ، سرحداں دے محافظاں کیتے وی مخالفاں دی زبان استعمال کیتی ڳئی اے، میں کئی واری آکھ چُکیاں جو پارلیمنٹ دے فلور کوں فوج اَتے عدلیہ مخالف بیان کیتے استعمال کرݨ دی اجازت نہ ݙیساں۔انہاں آکھیا جو عدلیہ اَتے فوج دے خلاف ٹویٹ کیتے گئن، حزب اختلاف حالات کوں ایں نہج تے گھن ڳئی اے جِتھوں واپسی ناممکن اے، مَیں مذاکرات کیتے چار قدم ودھائے پر ہݨ 40 قدم پِچھی تے تھی ڳیاں، پاکستان اے تاں اساں سارے ہیسے، سیاست وی اے اَتے سبھ کُجھ اے۔ ہک سوال دے جواب اچ انہاں آکھیا جےاپوزیشن مذاکرات کرݨ چاہندی اے تاں چنڳی ڳالھ اے۔