ملکی ترقی اَتے استحکام کیتے اتحاد و یکجہتی، دہشت گردی مکاوݨ ضروری اے، افواج پاکستان دے خلاف پروپیگنڈا ناقابل برداشت اے، شہباز شریف

اسلام آباد۔ 10 دسمبر(اے پی پی)وزیراعظم محمد شہباز شریف ملکی ترقی اَتے استحکام کیتے اتحاد و یکجہتی اَتے دہشت گردی مکاوݨ کوں لازمی قرار ݙیندے آکھیے جو ایںدے بغیر معاشی بحالی دا خواب پورا نئیں تھی سڳدا، افواج پاکستان دے خلاف پروپیگنڈا ناقابل برداشت اے، شہداء دیاں قربانیاں دی تضحیک نہ کرݨ ݙیسوں، عسکری و سیاسی قیادت رَل تے کم کیتے اَتے ڈیفالٹ دے کنارے تے کھڑی معیشت ول پٹڑی تے آئی اے۔ او قومی علماء کنونشن نال خطاب کریندے پئے ہن۔ نائب وزیراعظم و وزیر خارجہ اسحاق ڈار، چیف آف ڈیفنس فورسز و آرمی چیف فیلڈ مارشل سید عاصم منیر، وفاقی وزیر اطلاعات عطاء اللہ تارڑ سودھا وفاقی وزراء، اعلیٰ سرکاری حکام دے علاوہ علماء و مشائخ دی وݙی تعداد موجود ہئی۔ وزیراعظم آکھیا جو اللہ تعالیٰ دے وݙے فضل و کرم اَتے علماء کرام و قوم دیاں دعائیں دی برکت نال معرکہ حق اچ پاکستان کوں وݙی کامیابی مِلی اے، مسلح افواج دی جرات اَتے بہادری نال دشمن کوں عبرتناک شکست تھئی اے، چیف آف ڈیفنس فورسز فیلڈ مارشل سید عاصم منیر دی قیادت اچ افواج پاکستان جرات و بہادری نال دشمن کوں منہ توڑ جواب ݙتے، ایں کامیابی اچ بری، بحری و فضائیہ سودھا ساریاں افواج دا کردار قابل ستائش اے۔ وزیراعظم فرقہ پرستی مکاوݨ کوں ویلھے دی لوڑھ قرار ݙیندے آکھیے جو علماء کرام کوں تفرقہ بازی دا خاتمہ کرݨا ہوسی، ملکی ترقی اَتے استحکام کیتے اتحاد و یکجہتی ناگزیر اے، ایںدے بغیر ملک ترقی نئیں کر سڳدا۔ وزیراعظم آکھیا جو بلوچستان و خیبرپختونخوا اچ روزانہ بے گناہ عوام فتنہ الخوارج دی دہشت گردی دا نشانہ بݨدے پئن، سکیورٹی فورسز دے جوان ملکی دفاع کیتے ودھ قربانیاں ݙیندے پئن۔ انہاں شہداء دیاں قربانیاں کوں خراج عقیدت پیش کریندے آکھیا جو انہاں دیاں قربانیاں نا ونڄیسن، شہداء دے گھر آلیاں نال جݙاں اساں ملدے ہیں تاں او اپݨے شہداء تے ماݨ کریندن اَتے انہاں دے چہرے اطمینان بھریے ہوندن، اساں اپݨے انہاں شہداء دی تضحیک دی اجازت نہ ݙیسوں۔ وزیراعظم محمد شہباز شریف آکھیا جو ملک معاشی استحکام اَتے ترقی دو تیزی نال ودھدا پئے، عسکری و سیاسی قیادت رَل تے کم کر تے ڈیفالٹ دی کندھی تے کھڑی معیشت کوں ول پٹڑی تے گھن آئی اے، معرکہ حق دے بعد پاکستان تیزی نال ترقی کریندا پئے، حکومت ملک کوں معاشی ترقی دے سفر تے ٹورݨ کیتے ݙینھ رات ہک کیتا ہوئے، محنت نال پاکستان کوں او مقام ݙیویسوں جو قرضیاں توں نجات مِل ویسی اَتے خود انحصاری دی منزل ملسی۔ انہاں ملکی ترقی کیتے دہشت گردی مکاوݨ کوں ضروری قرار ݙیندے آکھیا جو دہشت گردی مکائے بغیر معاشی بحالی دے سفر تے ٹوریا ونڄ سڳدے۔ وزیراعظم افواج پاکستان دے خلاف پروپیگنڈا کوں ناقابل برداشت قرار ݙیندے آکھیے جو اے علماء کرام اَتے اساں ساریاں دی ذمہ داری اے جو اپݨی ایں فوج دا دفاع کروں جئیں ساݙے دفاع کیتے اپݨی رت نال نویں تاریخ لکھی اے اَتے ساݙے ازلی دشمن کوں اینڄھی شکست ݙتی اے جیکوں او قیامت تئیں نہ بُھلسی