پاکستان عالمی ثقافتی ورثے دے تحفظ کیتے پرعزم، ایں مقصد کیتے بین الاقوامی سطح اُتے سانجھیاں کوششاں ضروری ہَن، وفاقی وزیر اورنگزیب خان کھچی

روم ۔11دسمبر (اے پی پی) وفاقی وزیر قومی ورثہ و ثقافت اورنگزیب خان کھچی آکھیے جو “پاکستان عالمی ثقافتی ورثے دے تحفظ کیتے پرعزم اے ایں مقصد کیتے بین الاقوامی سطح اُتے سانجھیاں کوششاں ضروری ہَن۔ وزارت قومی ورثہ و ثقافت ولوں جاری بیان موجب اورنگزیب خان کھچی اے ڳالھ روم وچ انٹرنیشنل سینٹر فار سٹڈی آف پریزرویشن اینڈ ریسٹوریشن آف کلچرل پراپرٹی (آئی سی سی آر او ایم) دی جنرل اسمبلی دے 34ویں اجلاس وچ پاکستان دی نمائندگی کریندے آکھی۔ اُنہاں ایں ڳالھ اُتے زور ݙتے جو موسمیاتی تبدیلی، قدرتی آفات اتے مسلح جھیڑے دے ودھدے خطرات دے پیشِ نظر “عالمی ثقافتی ورثے کوں محفوظ بݨاوݨ کیتے سانجھیاں کوششاں ضروری ہَن، پاکستان آوݨ آلیاں نسلاں کیتے سانجھے ورثے دے تحفظ بارے آئی سی سی آر او ایم نال مکمل تعاون کیتے پرعزم اے۔وفاقی وزیر آئی سی سی آر او ایم دے فلیگ شپ پروگراماں جیویں ورلڈ ہیریٹیج لیڈرشپ، ڈیزاسٹر رسک مینجمنٹ اتے نینگراں دی شمولیت وچ پاکستان دی بھرپور شرکت کوں اُجاگر کیتے ۔اُنہاں آئی سی سی آر او ایم دی سٹریٹجک ترجیحات 2026-2031 دی بھرپور حمایت کریندے جنوب تعاون وچ ودھارے دی لوڑھ تے وی زور ݙتے۔ وفاقی وزیر چھل دے بعد پاکستان دے ثقافتی ورثے دی بحالی دے تجربے وی اجلاس دے شرکاء نال شیئر کیتَن جنہاں دی تعریف کیتی ڳئی۔آئی سی سی آر او ایم دے اجلاس وچ وزیر ثقافت اورنگزیب خان کھچی دی شرکت پاکستان دی وݙی ثقافتی سفارت کاری دا ہک حصہ اے انہاں دی اڄوکی شرکت او آئی سی کلچرل فیسٹیول (باکو) سودھا مختلف بین الاقوامی فورمز وچ پاکستان دے ودھدے کردار کوں اُجاگر کریندی اے، ایں دورے نال قومی سطح اُتے ثقافتی ورثے دے تحفظ کیتے تکنیکی معاونت اتے علمی تبادلے دے نویں رستے کُھلݨ دی توقع اے