ملک توں پولیو کیسز گھٹ کرݨ وچ کامیاب تھی ڳیوں ، اڄوکے سال صرف 30کیس رپورٹ تھئن، وفاقی وزیر صحت سید مصطفیٰ کمال

اسلام آباد۔ 11 دسمبر (اے پی پی) وفاقی وزیر قومی صحت سید مصطفیٰ کمال آکھیے جو اساں ملک توں پولیو دے کیسز گھٹ کرݨ وچ کامیاب تھی ڳیوں، گزریل سال پولیو دے74 کیسز ہن جݙاں جو جاری سال30 کیس رپورٹ تھئں ۔ اے ڳالھ انہاں سال 2025 دی چھیکڑی ملک گیر انسدادِ پولیو مہم دے افتتاح دے موقع آکھی۔ سید مصطفٰی کمال آکھیا جو اساں ملک توں پولیو دے کیسز گھٹ کرݨ وچ کامیاب تھی ڳیوں ، ایں مہم دے دوران4کروڑ50 لکھ ٻالاں کوں پولیو توں بچاوݨ دے قطرے پلائے ویسن ۔انہاں آکھیا جو پاکستان دے کجھ شہراں بشمول پشاور، کراچی اَتے لاہور اچ پولیو وائرس موجود اے، ٻالاں کوں پولیو وائرس توں بچاوݨ کیتے مہم دے دوران قطرے ضرور پلائے ونڄن۔ وزیر صحت آکھیا جو وفاقی حکومت پورے ملک توں وائرس مکاوݨ کیتے پُرعزم اے پر ایں کیتے ساریں کوں آپݨا کردار ادا کرݨا ہوسی۔ انہاں دا آکھݨ ہئی جو 30 پولیو کیسز وچوں19کیسز خیبر پختونخواہ توں ہن، 16کیسز جنوبی خیبر پختونخواہ وچ سامݨے آئے جِتھاں امن و امان دی صورتحال پاروں ݙو لکھ ٻالاں کوں پولیو توں بچاوݨ دے قطرے نی پلائے ونڄ سڳیے ۔سید مصطفیٰ کمال آکھیا جو پورے ملک اچ پولیو مہم15 توں21 دسمبر تئیں تھیسی جیں وچ 4 لکھ توں ودھ مرد و تریمتاں پولیو ورکر تہاݙے دروازے تے دستک ݙیسن۔ انہاں والدین توں اپیل کیتی جو او پولیو ورکرز نال تعاون کرن اَتے آپݨے5 سال توں گھٹ عمر دے ٻالاں کوں پولیو توں بچاوݨ کیتے ݙو قطرے لازمی پلاون۔انہاں آکھیا جو علما کرام وی پولیو مہم وچ آپݨا کردار ادا کرن۔