فیلڈ جنرل کورٹ مارشل پاک فوج دے سابق لیفٹیننٹ جنرل فیض حمید کوں الزامات ثابت تھیوݨ تے14 سال قید بامشقت سُݨا ݙتی

راولپنڈی۔ 11 دسمبر (اے پی پی) فیلڈ جنرل کورٹ مارشل پاک فوج دے سابق لیفٹیننٹ جنرل فیض حمید تے سیاسی سرگرمیاں وچ شامل تھیوݨ، آفیشل سیکرٹ دی خلاف ورزی، اختیارات اَتے سرکاری وسیلیں دے غلط استعمال اَتے لوکاں کوں مالی ضیان پڄاوݨ دے الزامات ثابت تھیوݨ تے14سال قید بامشقت سُݨا ݙتی۔ آئی ایس پی آر موجب، سابق لیفٹیننٹ جنرل فیض حمید دے خلاف پاکستان آرمی ایکٹ دیاں دفعات دے تحت فیلڈ جنرل کورٹ مارشل دی پندراں مہینے تے محیط کارروائی12 اگست2024 کوں شروع کیتی ڳئی۔ملزم تے چار الزامات دے تحت مقدمہ چلایا ڳیا جیڑھا سیاسی سرگرمیاں وچ شامل تھیوݨ، سرکاری راز دے قانون دی خلاف ورزی جیڑھی ریاست دی سلامتی اَتے مفاد کیتے نقصان دہ ہائی، اختیارات اَتے سرکاری وسیلیں دے غلط استعمال اَتے لوکاں کوں غلط مالی ضیان پڄاوݨ نال متعلق ہن۔ لمبے اَتے محنت طلب قانونی کارروائی دے بعد، عدالت ملزم کوں سارے الزامات وچ قصوروار پاتے اَتے14 سال قید بامشقت دی سزا سُݨائی، جیں دا اعلان 11دسمبر2025 کوں کیتا ڳیا ۔ فیلڈ جنرل کورٹ مارشل ساریاں قانونی دفعات دی تعمیل کیتی۔ ملزم کوں انہاں دے انتخاب دی دفاعی ٹیم سودھے سارے قانونی حقوق ݙتے ڳئے ہن۔ مجرم متعلقہ فورم تے اپیل دا حق رکھیندے۔آئی ایس پی آر دا آکھݨ ہئی جو سیاسی عناصر نال رَل تے مخصوص سیاسی اشتعال انگیزی اَتے عدم استحکام کوں ہوا ݙیوݨ اَتے کجھ ٻئے معاملیں وچ مجرم دی شمولیت نال علیحدہ طور تے نبݨیا ویندا پئے۔