وزیراعظم شہباز شریف دی ٹیکس ٹو جی ڈی پی شرح دے11فیصد دے ہدف دے حصول کیتے کوششاں تیز کرݨ، اَتے ٹیکس محصولات دے اہداف کیتے ٹیکس دے دائرہ کوں مزید ودھاوݨ دی ہدایت

اسلام آباد۔ 11 دسمبر (اے پی پی) وزیراعظم محمد شہباز شریف ٹیکس ٹو جی ڈی پی شرح دے11 فیصد دے ہدف دے حصول کیتے کوششاں تیز کرݨ اَتے ٹیکس محصولات دے اہداف دے حصول کیتے ٹیکس دے دائرہ کوں مزید ودھاوݨ دی ہدایت کیتی اے۔ وزیراعظم دفتر دے میڈیا ونگ توں جاری بیان موجب ، وزیراعظم محمد شہباز شریف دی صدارت اچ ایف بی آر دے امور دے حوالے نال ہفتہ وار جائزہ اجلاس تھیا۔اجلاس اچ وزیراقتصادی امور احد خان چیمہ، وزیر قانون اعظم نذیر تارڑ، وزیر اطلاعات و نشریات عطا اللہ تارڑ، وزیر پٹرولیم علی پرویز ملک، وزیر مملکت خزانہ بلال اظہر کیانی، اٹارنی جنرل آف پاکستان، چیئرمین ایف بی آر اَتے متعلقہ اداریں دے اعلیٰ افسر شامل ہن۔وزیراعظم کسٹمز کلیئرنس وچ جدید ٹیکنالوجی اَتے اے آئی دے استعمال نال کلیئرنس دے ویلھے وچ وݙی گھٹکی تے ایف بی آر حکام کوں شاباش ݙتی جݙاں جو سگریٹ بݨاوݨ آلی غیر قانونی فیکٹریاں دے خلاف مؤثر کارروائی تے ایف بی آر اَتے قانون نافذ کرݨ آلے اداریں کوں وی شاباش ݙتی۔ وزیراعظم آکھیا جو درآمدات اَتے برآمدات دی کسٹمز کلیئرنس دے ویلھے کوں مزید گھٹ کیتا ونڄے، حکومتی محصولات ودھاوݨ کیتے معیشت دے سارے شعبیں وچ ٹیکس انفورسمنٹ کوں یقینی بݨایا ونڄے۔وزیراعظم ایف بی آر دے ٹیکس چوراں اَتے غیر قانونی فیکٹریاں دے خلاف اقدامات وچ صوبائی حکومتاں کوں ایف بی آر نال پورا تعاون جاری رکھݨ اَتے سیلز ٹیکس ریفنڈ دی ویلھے سر ادائیگی یقینی بݨاوݨ دی ہدایت وی کیتی۔وزیراعظم کوں ٹیکس محصولات دے اہداف دے حصول دی پیشرفت، معیشت دی ڈیجیٹائزیشن اَتے ٹیکس چوری دے خلاف اقدامات دی پیشرفت تے بریفنگ ݙتی ڳئی۔ بریفنگ وچ ݙسیا ڳیا جو پورے ملک اچ تماخوں دے شعبے کوں ٹیکس نیٹ وچ گھن آوݨ کیتے ایف بی آر اَتے محکمہ ایکسائز اینݙ ٹیکسیشن ولوں ٻہوں سارے فوکل پرسنز تعینات کیتے ڳئن۔ اڄوکے ݙینھاں وچ مؤثر کارروائی دے نتیجے وچ غیر قانونی سگریٹس دی وݙی تعداد قبضے وچ ڳھدی ڳئی اے۔ وزیراعظم کوں ٹربیونلز اَتے مختلف اداریں وچ ٹیکس دے زیر التواء مقدمیں دی پیشرفت تے وی بریفنگ ݙتی ڳئی۔