عدلیہ بین المذاہب ہم آہنگی، برابری، مذہبی آزادی اَتے انسانی وقار دے تحفظ کیتے پُرعزم اے، جسٹس یحییٰ آفریدی

اسلام آباد۔ 11 دسمبر (اے پی پی) چیف جسٹس آف پاکستان جسٹس یحییٰ آفریدی آکھیے جو بین المذاہب ہم آہنگی، برابری، مذہبی آزادی اَتے انسانی وقار آئینِ پاکستان دے بنیادی اصول ہن، جنہاں دے تحفظ اَتے ودھارےکیتے عدلیہ پُرعزم اے۔ سپریم کورٹ آف پاکستان وچ کرسمس ڈے دی مناسبت نال منعقدہ خصوصی تقریب توں خطاب کریندے چیف جسٹس مسیحی برادری دے ملازمین کوں کرسمس دی مبارخ ݙیندے ادارے دی خدمت وچ انہاں دے کردار اَتے محنت دی تعریف کیتی۔سپریم کورٹ دے شعبہ تعلقات عامہ توں جاری اعلامیہ موجب، سپریم کورٹ آف پاکستان وچ کرسمس ڈے دے حوالے نال ھک خصوصی تقریب دا انعقاد کیتا ڳیا جیں وچ مسیحی برادری نال تعلق رکھݨ آلے ملازمین اَتے سکیورٹی سٹاف نال رَل تے کرسمس دا جشن منایا ڳیا۔ تقریب وچ چیف جسٹس، سپریم کورٹ دے معزز جج صاحبان اَتے سپریم کورٹ بار ایسوسی ایشن دے صدر مسیحی برادری نال تعلق رکھݨ آلے ملازمین اَتے سکیورٹی سٹاف نال رَل تے کیک کٹیا۔ ایں موقع تے مسیحی ملازمین دی وݙی تعداد موجود ہئی جیں نال رواداری، ہم آہنگی اَتے سانجھےاحترام دا سوہݨا مظاہرہ ݙیکھݨ وچ آیا۔ تقریب وچ رجسٹرار، افسران اَتے سپریم کورٹ دے ملازمین وی شرکت کیتی۔ اے تقریب ایں ڳالھ دی عکاس اے جو سپریم کورٹ آف پاکستان ملک اچ ثقافتی اَتے مذہبی تنوع دے ودھارے کیتے مسلسل آپݨا کردار ادا کریندی پئی اے، جیڑھا پاکستان دے بنیادی اصولاں، یعنی برداشت، یکجہتی اَتے وحدت نال ہم آہنگ اے۔