افغانستان اَتے بھارت توں دہشت گردی اچ استعمال تھیوݨ آلے سوشل میڈیا اکاؤنٹس دے خلاف فوری کارروائی کیتی ونڄے، وزیر مملکت برائے داخلہ دی انٹرنیشنل میڈیا کوں بریفنگ

اسلام آباد۔ 11 دسمبر(اے پی پی) پاکستان انٹرنیشنل میڈیا کوں بریفنگ ݙیندے ہوئیں بھارت اَتے افغانستان توں چلائے ونڄݨ آلے اُنھاں درجناں سوشل میڈیا اکاؤنٹس دی تفصیلات ݙتین، جیڑھے ملک اچ دہشت گردی کوں ودھاوݨ اچ استعمال تھیندے پئن۔ حکومت سوشل میڈیا پلیٹ فارمز توں فوری طور تے اپݨے دفتر پاکستان اچ بݨاوݨ اَتے ملک دے قوانین تے عمل درآمد کرݨ دا مطالبہ کیتے۔ وزیر مملکت برائے داخلہ طلال چوہدری اَتے وزیر مملکت برائے قانون بیرسٹر عقیل ولوں غیر ملکی میڈیا کوں بریفنگ ݙتی ڳئی، جِیندے اچ سوشل میڈیا دے غلط استعمال اَتے ایندے تے قابو پاوݨ کیتے پاکستان دی پالیسی دی وضاحت کیتی ڳئی۔ وزیر مملکت داخلہ طلال چوہدری انکشاف کیتا جو حکومت پاکستان مختلف دہشت گرد تنظیماں، جِیندے اچ “فتنہ الخوارج” اَتے “بی ایل اے” (بلوچستان لبریشن آرمی) شامل ہین، دے درجناں سوشل میڈیا اکاؤنٹس دی نشاندہی کیتی اے، اَتے متعلقہ پلیٹ فارمز کوں اُنہاں دی بندش کیتے ٻہوں واری درخواستاں کیتاں ہین۔ اُنہاں واضح کیتا جو پاکستان اچ دہشت گردی بارے اے اکاؤنٹس افغانستان اَتے بھارت توں آپریٹ تھیندے پِن، اَتے حکومت کولو ایندے ٹھوس ثبوت موجود ہِن۔ طلال چوہدری مطالبہ کیتا جو پاکستان اچ دہشت گردی اچ استعمال تھیوݨ آلے سوشل میڈیا اکاؤنٹس دے خلاف فوری کارروائی کیتی ونجے۔ اُنہاں اے وی تجویز ݙتی جو سوشل میڈیا پلیٹ فارمز کوں آرٹیفیشل انٹیلی جنس (اے آئی) الگو رتھم دے ذریعے دہشت گردی نال منسلک اکاؤنٹس کوں فوری طور تے بند کرݨا چاہیدے۔ وزیر مملکت برائے داخلہ سارے سوشل میڈیا پلیٹ فارمز توں فوری طور تے اپݨے دفتر پاکستان اچ کھولݨ اَتے قانونی تقاضیاں دے مطابق عمل کرݨ دا مطالبہ کریندے آکھیا جو اساݙے اداریاں کوں آئی پی ایڈریس ݙتے ونڄن اَتے پاکستان دے سوشل میڈیا بارے قوانین تے پورا عمل درآمد تھیوݨا چاہیدے۔ طلال چوہدری واضح کیتا جو حکومت قانونی تقاضے پورے نہ کرݨ تے سوشل میڈیا پلیٹ فارمز کوں فوری طور تے پاکستان اچ بند نئیں کرݨا چاہندی، ٻھل او تعاون اَتے قانون تے عمل درآمد یقینی بݨاوݨا چاہندی اے۔ طلال چوہدری مختلف سوشل میڈیا پلیٹ فارمز دے تعاون دی سطح دا وی ذکر کیتا۔ اُنہاں دے مطابق، حکومت پاکستان نال سب توں گھٹ تعاون ایکس (پہلاں ٹوئٹر) دا اے۔ ݙوجھے پاسے، اُنہاں ݙسیا جو حکومت پاکستان نال سب توں چنڳا تعاون ٹیلی گرام دا اے۔ ایں موقع تے وزیر مملکت برائے قانون بیرسٹر عقیل زور ݙتا جو پاکستان دے سوشل میڈیا قوانین تے عمل تھیوݨا چاہیدے۔ اُنہاں عالمی سطح دی مثال ݙیندے ہوئیں ݙسیا جو برازیل اچ ایکس تے جُرمانے دی مثال موجود اے، اَتے اِیہو ڄھیں اساݙے ملک اچ موجود سوشل میڈیا قانون تے وی عمل درآمد تھیوݨا چاہیدے۔