افغانستان دی سرزمین دہشت گردانہ حملیاں کیتے استعمال کیتی ویندی پئی اے، افغان قیادت اپݨی سرزمین دا غلط استعمال روکݨ یقینی ٻݨاوے، ترجمان دفتر خارجہ دی پریس بریفنگ

اسلام آباد۔ 11 دسمبر(اے پی پی) پاکستان اپݨے ایں موقف کوں ول دوہرائے جو افغانستان دی سرزمین دہشت گردانہ حملیاں کیتے استعمال کیتی ویندی پئی اے، جِیندے اچ بھارت دے ملوث ہووݨ دے صاف اشارے ملین، افغان قیادت اپݨی سرزمین دے ایں غلط استعمال کوں مُکاوݨ کیتے تحریری یقین دہانی کراوے۔ دفتر خارجہ دے ترجمان طاہر حسین اندرابی پریس بریفنگ اچ کابل اچ علمائے کرام دے ہک اجتماع ولوں منظور کیتی ڳئی قرارداد بارے سوال تے ولدے اچ آکھیے جو افغانستان دی سرزمین کہیں ݙوجھے ملک کوں خطرہ یا نقصان پُجاوݨ کیتے استعمال نئیں کیتی ونجݨی چاہیدی۔ ترجمان قرارداد کوں مثبت پیش رفت قرار ݙیندے ہوئیں صورت حال دی سنگینی دے احساس دا خیر مقدم کیتا، ٻھل اُنہاں آکھیا جو ماضی اچ وی اینڄھے وعدے کیتے ڳئے ہن، پر او پورے نہ تھئے ہِن۔ اُنہاں آکھیا جو افغانستان نال مذاکرات اَتے برادر ملکاں دی ثالثی دی کوششاں دے دوران پاکستان افغانستان کوں تحریری یقین دہانی تے زور ݙِتا ہئی۔ ترجمان دفتر خارجہ آکھیا جو یقیناً اساکوں ایں معاملے تے افغان قیادت توں تحریری یقین دہانی دی ضرورت ہوسی۔ ہک سوال دے جواب اچ ترجمان آکھیا جو ٹی ٹی پی، فتنہ الخوارج اَتے فتنہ ہندوستان سودھا دہشت گرد عناصر جیڑھے افغان سرزمین توں آپریٹ کریندے پئن، کوں بھارت دی سرگرم حمایت حاصل اے۔ اُنہاں میڈیا کوں ݙسایا جو پاکستان اچ دہشت گردی دی سرپرستی اچ بھارت دے ملوث ہووݨ بارے پاکستان کولو دستاویزی ثبوت موجود ہین، کلبھوشن یادیو اَتے جعفر ایکسپریس تے حملہ اینڄھیاں ٻہوں ساریاں مثالاں اچ شامل ہِن۔ بھارت ولوں غیر قنونی طور تے زیر تسلط جموں و کشمیر اچ انسانی حقوق دی خلاف ورزیاں دا ݙسیندے اُنہاں آکھیا جو اقوام متحدہ دے انسانی حقوق دے ماہرین اَتے بین الاقوامی حقوق دے اداریاں دیاں رپورٹس مقبوضہ کشمیر اچ ٻہوں وݙے پیمانے تے تھیوݨ آلیاں خلاف ورزیاں کوں سامݨے گھن آئن، جِیندے اچ حالیہ پہلگام حملے دے بعد تقریباً 2,800 بندیاں دی گرفتاریاں وی شامل اے۔ اُنہاں آکھیا جو کشمیری عوام دا نہ مُکݨ آلا حق خودارادیت اقوام متحدہ دی سلامتی کونسل دے ایجنڈے اچ شامل اے۔ ترجمان ایں ڳالھ کوں دوہرایا جو کشمیر بارے اقوام متحدہ دی سلامتی کونسل دی متعلقہ قرارداداں دے مطابق پاکستان کشمیریاں دے حق خودارادیت کوں پورا تھیوݨ تئیں اٹل اخلاقی، سیاسی، اَتے سفارتی حمایت جاری رکھیسی۔ ترجمان انڈونیشیا دے صدر پرابوو سوبیانتو دے ݙو ݙیہاڑے دے دورہ اسلام آباد بارے آکھیا جو ایندے اچ ݙو طرفہ دفاعی تعاون اَتے غزہ دی صورتحال تے ڳالھ مہاڑ کیتی ڳئی۔ اُنہاں آکھیا جو بین الاقوامی استحکام فورس اچ حِصہ گھنݨ کہیں وی ملک دا خود مختار فیصلہ ہوسی، ڄے تئیں پاکستان دا تعلق اے، اینڄھا خود مختار فیصلہ ہݨ تئیں نئیں کیتا ڳیا۔ طاہر حسین اندرابی آکھیا جو پاکستان انسانی ہمدردی دی بنیاد تے امداد دی بغیر کہیں روک ٹوک دے نقل و حرکت ݙیوݨ دی خواہش دے تحت افغانستان کوں انسانی امداد دی منظوری ݙے ݙتی اے اَتے اے طالبان تے منحصر اے جو او ایکوں حاصل کرن۔ سارک دے عمل کوں بھارت ولوں روکݨ کوں افسوسناک قرار ݙیندے اُنہاں آکھیا جو پاکستان کثیرالجہتی کیتے پُر عزم اے اَتے او جنوبی ایشیا اچ ترقی، خوشحالی اَتے رَوابط کوں مضبوط بݨاوݨ کیتے کہیں وی قدم دا خیر مقدم کریسی۔ ترجمان وفاقی وزیر داخلہ سید محسن نقوی ولوں کڄھ بندیاں دی حوالگی کیتے برطانوی حکام نال ڳالھ ٻات بارے پُوچھے ونڄݨ تے آکھیا جو ہݨ تئیں پاکستان اَتے برطانیہ دے درمیان حوالگی دا کوئی باقاعدہ معاہدہ کائنی ٻھل باضابطہ معاہدے دے نہ ہووݨ دی صورت اچ حوالگی دے مقدمیاں کوں کیس ٹو کیس دی بنیاد تے چلایا ونڄ سڳدے۔ اُنہاں نائب وزیر اعظم محمد اسحاق ڈار دی ایران دے وزیر خارجہ عباس عراقچی اَتے سعودی وزیر خارجہ شہزادہ فیصل بن فرحان السعود نال تھیوݨ آلی ٹیلی فونک ڳالھ ٻات توں وی میڈیا کوں آگاہ کیتا، جِیندے اچ اُنہاں ݙو طرفہ اَتے علاقائی معاملیاں تے الائے۔ ترجمان بھارتی وزیر خارجہ دے پاکستان مخالف ریمارکس کوں مسترد کریندے ہوئیں اُنہاں کوں ٻہوں اشتعال انگیز، بے بنیاد، اَتے غیر ذمے وارانہ قرار ݙِتا اَتے آکھیا جو پاکستان دے ادارے، جِیندے اچ مسلح افواج وی شامل ہِن، قومی سلامتی دا ستون ہِن، اَتے او ملک دی خودمختاری اَتے علاقائی سالمیت دے تحفظ کیتے پُر عزم ہِن۔ اُنہاں آکھیا جو مئی 2025ء دے تنازعے پاکستان دی مسلح افواج دی پیشہ ورانہ مہارت دے نال نال مادر وطن اَتے پاکستانی عوام دے کہیں وی بھارتی جارحیت دے خلاف مناسب، موثر، اَتے ذمے وارانہ انداز اچ دفاع کرݨ دے عزم دا صاف ثبوت ݙتے۔ ترجمان آکھیا جو بھارتی قیادت ولوں پاکستان دے ریاستی ادارے اَتے ایندی قیادت کوں بدنام کرݨ دیاں کوششاں ہک پروپیگنڈہ مہم دا حِصہ ہِن، جیڑھا خطے اَتے ایندے توں ٻاھرو بھارت دیاں غیر مستحکم کاروائیاں دے نال نال پاکستان اچ ایندی ریاستی سرپرستی اچ دہشت گردی توں توجہ ہٹاوݨ کیتے بݨائی ڳئی اے۔