وزیر اعظم محمد شہباز شریف دی ترکمانستان دے صدر سردار بردی محمدوف نال ݙو طرفہ ملاقات

اشک آباد۔ 11 دسمبر (اے پی پی)وزیراعظم محمد شہباز شریف پاکستان اَتے ترکمانستان وچال تجارتی اَتے اقتصادی رَوابط سودھا ݙو طرفہ تعلقات کوں مضبوط بݨاوݨ دے عزم اَتے زمینی اَتے سمندری رستیاں دے ذریعے رَوابط ودھاوݨ دی خواہش ݙسیندے ترکمانستان کوں کراچی اَتے گوادر دیاں بندرگاہواں دے ذریعے اپݨی پُڄ کوں ودھاوݨ دی پیشکش کیتی اے۔ وزیر اعظم آفس دے میڈیا ونگ دے جاری بیان دے مطابق، وزیر اعظم محمد شہباز شریف دی اشک آباد اچ ترکمانستان دے صدر سردار بردی محمدوف نال ݙو طرفہ ملاقات تھئی۔ وزیر اعظم ترکمانستان دی مستقل غیرجانبداری دی 30 ویں سالگرہ اَتے اقوام متحدہ ولوں 2025ء کوں امن اَتے اعتماد دا بین الاقوامی سال قرار ݙیوݨ تے ترکمان صدر کوں مبارکباد ݙتی۔ پاکستان اَتے ترکمانستان وچال تاریخی اَتے برادرانہ تعلقات دی اہمیت تے زور ݙیندے وزیر اعظم ݙوہیں ملکاں وچال ݙو طرفہ تعلقات، خاص کر تجارتی اَتے اقتصادی رَوابط، کوں مضبوط بݨاوݨ دا عزم دوہرایا۔ وزیر اعظم اِیں سال دے شروع اچ ایران اسرائیل جنگ ویلھے پاکستانی شہریاں کوں ایران توں بحفاظت کڈھݨ کیتے تعاون تے ترکمانستان دی قیادت اَتے حکومت دا دلوں شکریہ ادا کیتا۔ اُنہاں ترکمانستان نال زمینی اَتے سمندری رستیاں دے ذریعے رَوابط ودھاوݨ دی پاکستان دی خواہش کوں دوہرایا اَتے آکھیا جو کراچی اَتے گوادر دیاں بندرگاہواں دا جغرافیہ مثالی اے جیکوں ترکمانستان جنوبی ایشیا اَتے اِیندے توں ٻاھرو اپݨی پُڄ کوں ودھاوݨ کیتے استعمال کر سڳدے ہیں۔ پاکستانی وفد دی شاندار مہمان نوازی تے ترکمانستان دے صدر دا شکریہ ادا کریندے ہوئیں وزیر اعظم ترکمانستان دے عوام دے قومی رہنما گربنگولی بردی محمدوف کیتے نیک خواہشات پچائن۔ وزیر اعظم ترکمانستان دے عوام دے قومی رہنما اَتے صدر سردار بردی محمدوف کوں آوݨ آلے سال پاکستان دا سرکاری دورہ کرݨ دی دعوت دا وی اعادہ کیتا۔ ترکمانستان دے صدر وزیر اعظم دے دورے اَتے امن و اعتماد دے بین الاقوامی فورم اچ شرکت تے شکریہ ادا کریندے ہوئیں آکھیا جو ترکمانستان پاکستان نال آپسی دلچسپی دے کئی شعبیاں اچ ݙو طرفہ تعاون کوں ودھاوݨ چاہندے۔ وزیر اعظم امن اَتے اعتماد دے عالمی سال (2025)، غیر جانبداری دے بین الاقوامی ݙیہاڑ، اَتے ترکمانستان دی مستقل غیرجانبداری دی 30 ویں سالگرہ دے موقع تے بین الاقوامی فورم اچ شرکت کیتے ترکمانستان دے ݙو ݙیہاڑے دے سرکاری دورے تے ہِن۔ نائب وزیر اعظم و وزیر خارجہ سینیٹر محمد اسحاق ڈار، وفاقی وزیر توانائی اویس احمد خان لغاری، وفاقی وزیر اطلاعات عطاء اللہ تارڑ، اَتے کابینہ دے ݙوجھے اراکین اَتے اعلیٰ سرکاری افسر وی ملاقات اچ موجود ہِن۔