جدید ٹیکنالوجی تئیں ساریں کیتے منصفانہ اَتے بَلا امتیاز رسائی ضروری اے، سماجی و اقتصادی ترقی اَتے عوام دی فلاح و بہبود حکومت دی پہلی ترجیح اے، وزیراعظم شہباز شریف

اشک آباد۔ 12 دسمبر (اے پی پی) وزیراعظم محمد شہباز شریف موسمیاتی تبدیلی، غربت اَتے عدم مساوات کوں دنیا کیتے وݙے چیلنج قرار ݙیندے آکھیے جو جدید ٹیکنالوجی تئیں ساریں کیتے منصفانہ اَتے بَلا امتیاز رسائی ضروری اے۔ سماجی و اقتصادی ترقی اَتے عوام دی فلاح و بہبود پاکستان دی حکومت دی پہلی ترجیح اے۔ موسمیاتی تبدیلیاں پاروں تھیوݨ آلے ضیان توں ترقی پذیر ملکاں کوں اوکھ دا سامݨا اے، جھیڑیں دا پرامن حل پاکستان دی خارجہ پالیسی دا بنیادی ستون اے، پاکستان عالمی امن و سلامتی دے ودھارے کیتے بھرپور کردار ادا کریندا پئے، دہشت گردی مکاوݨ کیتے پُرعزم ہیسے، عالمی برادری افغان طالبان حکومت تے زور ݙیوے جو او آپݨی سرزمین توں دہشت گرد کارروائیاں بند کراوے۔ پاکستان فلسطینی عوام اَتے بہادر کشمیریاں دے بنیادی حق، حق خود ارادیت کیتے کیتی ونڄݨ آلی کوششاں دی حمایت کریندا رہسی۔اے ڳالھ انہاں بین الاقوامی سال برائے امن و اعتماد، عالمی ݙینھ غیر جانبداری اَتے ترکمانستان دی 30سالہ مستقل غیر جانبداری دی سالگنڈھ دے حوالے نال منعقدہ فورم توں خطاب کریندے آکھی ۔وزیر اعظم آکھیا جو اشک آباد جیھے سوہݨے شہر وچ موجودگی میں کیتے خوشی دی ڳالھ اے، سفید سنگ مرمر دی خوبصورتی اَتے ترکمان عوام دی گرمجوشی قابل تعریف اے۔ انہاں آکھیا جو اگرچہ اے ترکمانستان دا میݙا پہلا دورہ اے پر میں آپݨے آپ کوں اتھاں بالکل اجنبی محسوس نی کریندا پیا، ترکمانستان دی مہمان نوازی آپݨی مثال آپ اے، مہمان کوں گھر دے لوکاں توں ودھ احترام ݙیوݨ ترکمانستان دی روایت اے، ترکمانستان دے قومی رہنما قربان گلی بردی محمدوف اَتے ترکمانستان دے صدر سردار بردی محمدوف میں کیتے بھراواں وانڳوں ہن اَتے پاکستان اَتے ترکمانستان دی دوستی کوں مضبوط بݨاوݨ وچ انہاں دا اہم کرداراے۔وزیراعظم آکھیا جو ترکمانستان دی قیادت کوں مستقل غیر جانبداری دے30 سال پورے تھیوݨ اَتے2025 کوں اقوام متحدہ ولوں امن و اعتماد دا سال قرار ݙیوݨ دی کامیاب کوشش تے مبارخ پیش کرینداں۔ وزیراعظم آکھیا جو پاکستان جاری سال سلامتی کونسل وچ غیر مستقل رکن دے طور تے آپݨیاں ذمہ واریاں سنبھالیاں اَتے عالمی امن و سلامتی دے ودھارےکیتے بھرپور کردار ادا کریندا پئے، دہشت گردی مکاوݨ کیتے پُرعزم ہیسے۔انہاں آکھیا جو دہشت گردی دا خطرہ افغان سرزمین توں سر چیندا پئے، ایں خطرے نال نبݨݨ کیتے کوششاں کیتیاں ویندیاں پئن، ایں دے نال نال عالمی برادری کوں وی چاہیدے جو او افغان طالبان حکومت تے زور ݙیوے جو او آپݨیاں بین الاقوامی ذمہ واریاں اَتے وعدے پورے کرے اَتے آپݨی سرزمین توں دہشت گردی دیاں کارروائیاں کرݨ آلے دہشت گرداں کوں روکے۔وزیراعظم آکھیا جو پاکستان مستقل جنگ بندی کیتے قطر، ترکیہ، سعودی عرب، متحدہ عرب امارات اَتے ایران دیاں پرخلوص کوششاں دا خیرمقدم کریندے، جھیڑیں دا پرامن حل پاکستان دی خارجہ پالیسی دا بنیادی ستون اے، پاکستان دی حمایت نال غزہ امن منصوبہ منظور تھیا جیں دی بعد وچ اقوام متحدہ دی سلامتی کونسل وی توثیق کیتی، جاری سال دے شروع اچ اقوام متحدہ دی قرارداد 2788 دی منظوری جھیڑیں دے پرامن حل کیتے پاکستان دے عزم دی بھرپور عکاسی کریندی اے۔8عرب اسلامی ملکاں دے گروپ دے رکن دی حیثیت نال اساکوں امید اے جو مشرق وسطیٰ اچ جاری امن دیاں کوششاں نال بے گناہ فلسطینیاں دیاں جاناں دے تحفظ کوں یقینی بݨاوݨ وچ مدد مِلسی اَتے مستقل اَتے پائیدار جنگ بندی، انسانی ہمدردی دی بنیاد تے امداد دی مستقل فراہمی کوں یقینی بݨایا ونڄ سڳسی اَتے غزہ دی تعمیر نو وچ مدد مِلسی۔انہاں آکھیا جو مشرق وسطیٰ اچ دیرپا جنگ بندی اَتے انسانی ہمدردی دی بنیاد تے امداد ݙٰیوݨ ضروری اے، پاکستان فلسطینی عوام اَتے بہادر کشمیریاں دے بنیادی حق، حق خود ارادیت کیتے ساریاں کوششاں دی حمایت کریندا رہسی۔ پائیدار امن دی خواہش پائیدار ترقی نال جُڑی ہوئی اے، ایں سلسلے وچ2030 دا پائیدار ترقی دا ایجنڈا ھک بہتر اَتے پرامن دنیا کیتے ٻہوں اہم اے، سماجی و اقتصادی ترقی اَتے عوام دی فلاح و بہبود پاکستان دی حکومت دی پہلی ترجیح اے۔انہاں آکھیا جو اساں مالیاتی شمولیت دے شعبے وچ پیشرفت دے نال نال تریمتاں اَتے کمزور طبقیں کوں اقتصادی دھارے وچ گھن آوݨ کیتے مؤثر اقدامات کیتن۔ گلوبل وارمنگ دے حوالے نال انہاں آکھیا جو پاکستان صاف اَتے ساوے ماحول کیتے حل پیش کیتن اَتے ایں حوالے نال اساݙے اقدامات عالمی مثال ہن۔ انہاں آکھیا جو موسمیاتی تبدیلیاں پاروں تھیوݨ آلے ضیان توں ترقی پذیر ملکاں کوں اوکھ دا سامݨا اے، اساکوں چھل پاروں وݙے پیمانے تے جانی اَتے مالی ضیان دا سامݨا کرݨا پئے ، موسمیاتی تبدیلی، غربت اَتے عدم مساوات دنیا کیتے وݙے چیلنجز ہن، اے ھک عالمی خطرہ ہن جیڑھے سانجھی ذمہ واری دے تحت عملی اقدامات دے متقاضی ہن، جدید ٹیکنالوجی بالخصوص ڈیجیٹل ٹیکنالوجی تئیں منصفانہ اَتے بَلا امتیاز رسائی ضروری اے۔