ملکی سطح تے زیتون دی پیداوار گھنݨ نال ارباں روپے دے درآمدی خرچے بچائے ونڄ سڳدن، رانا تنویر حسین

اسلام آباد۔ 12 دسمبر (اے پی پی) وفاقی وزیر قومی غذائی تحفظ و تحقیق رانا تنویر حسین آکھیے جو ملکی سطح تے زیتون دی پیداوار گھنݨ نال ارباں روپے دے درآمدی خرچے بچائے ونڄ سڳدن۔ ستویں نیشنل اولیو گالا اچ بطورِ مہمانِ خصوصی شرکت کیتی۔ ایں موقع تے پورے ملک توں کسان، ماہرینِ زراعت، تحقیقی اداریں دے نمائندے اَتے نجی شعبے دے سانجھے داراں وݙی تعداد وچ شرکت کیتی۔تقریب توں خطاب کریندے وفاقی وزیر آکھیا جو پاکستان دا موسم اعلیٰ معیار دی زیتون دی کاشت کیتے ٻہوں چنڳاں اے، اَتے خوش آئند ڳالھ اے جو زیتون ہݨ ھک تجرباتی سرگرمی نی رہی بلکہ ھک تکھی اُبھرݨ آلی صنعت دی شکل اختیار کر ڳئی اے۔رانا تنویر حسین آکھیا جو زیتون دے شعبے نال پورے ملک اچ ہزاراں کساناں کوں نہ صرف منافع بخش روزگار مِلدا پئے بلکہ اے ذریعہ معاش موسمیاتی تبدیلی دے مقابلے اچ وی زیادہ محفوظ اے۔ انہاں ایں اعتماد دا اظہار کیتا جو پاکستان خطے وچ زیتون دی کاشت، پروسیسنگ اَتے ویلیو ایݙیشن دا اہم مرکز بݨݨ دی بھرپور صلاحیت رکھیندے ۔وفاقی وزیر آکھیا جو ملک اچ زیتون دے ودھارے نال کھاوݨ آلے تیل دی درآمد وچ واضح گھٹکی گھن آئی ونڄ سڳدی اے، جݙاں جو دیہاتی معیشت وچ وݙا ودھارا ممکن اے۔ انہاں آکھیا جو کسان اساݙی ریڑھ دی ہݙی ہن، انہاں کوں ہر ممکن تعاون ݙیسوں۔ حکومت معیاری ٻوٹے ݙیوݨ ، جدید تحقیق اَتے آئل ایکسٹریکشن سہولتاں کوں مزید بہتر بݨاوݨ کیتے پُرعزم اے۔رانا تنویر حسین آکھیا جو زیتون پاکستان دی ھک سٹریٹجک فصل بݨ چُکی اے، جیڑھی پاݨی دی گھٹکی آلے علاقیں کیتے ٻہوں چنڳی اے اَتے موسمیاتی تبدیلی دے چیلنجز دا بہترین حل پیش کریندی اے۔ انہاں مزید آکھیا جو زیتون دی کاشت نہ صرف دیہاتی معیشت کوں طاقت ݙیندی پئی اے بلکہ نوجواناں اَتے تریمتاں کیتے وی ویلیو چین وچ ٻہوں سارے کاروباری موقع پیدا کریندی پئی اے۔وفاقی وزیر ایں ڳالھ تے زور ݙِتا جو ملک وچ تیار تھیوݨ آلا زیتون دا تیل ھک صحت مند، معیاری اَتے مقامی طور تے دستیاب بہترین متبادل اے۔ انہاں آکھیا جو ایں شعبے دے ودھارے دے نتیجے وچ ملکی سطح تے زیتون نال ارباں روپے دے درآمدی خرچے بچائے ونڄ سڳدن۔ رانا تنویر حسین آکھیا جو پاکستان دا اولیو ہب بݨݨ دا سفر تکھے اڳوں ودھدا پئے اَتے حکومت ایں سفر کوں مزید طاقت ݙیوݨ کیتے سارے وسیلے استعمال کریسی۔