برسلز۔ 12 دسمبر(اے پی پی) وفاقی وزیر داخلہ و نارکوٹکس کنٹرول محسن نقوی دی برسلز وچ عراق دے وزیر داخلہ جنرل عبدالامیر الشمری نال اہم ملاقات تھئی جیں وچ پاک-عراق ݙو طرفہ تعلقات اَتے زائرین دی سہولت کیتے اقدامات تے تفصیلی ڳالھ مہاڑ کیتی ۔ ملاقات وچ ݙوہیں ملکاں دی وزارتِ داخلہ وچال تعاون کوں پائیدار اَتے مؤثر بنیاداں تے ودھارا ݙیوݨ تے اتفاق تھیا۔عراقی وزیر داخلہ پاکستان ولوں زائرین …
وفاقی وزیرداخلہ محسن نقوی دی آپݨے عراقی ہم منصب جنرل عبدالامیر الشمری نال ملاقات، پاک-عراق سانجھے تعلقات تے ڳالھ مہاڑ
برسلز۔ 12 دسمبر(اے پی پی) وفاقی وزیر داخلہ و نارکوٹکس کنٹرول محسن نقوی دی برسلز وچ عراق دے وزیر داخلہ جنرل عبدالامیر الشمری نال اہم ملاقات تھئی جیں وچ پاک-عراق ݙو طرفہ تعلقات اَتے زائرین دی سہولت کیتے اقدامات تے تفصیلی ڳالھ مہاڑ کیتی ۔ ملاقات وچ ݙوہیں ملکاں دی وزارتِ داخلہ وچال تعاون کوں پائیدار اَتے مؤثر بنیاداں تے ودھارا ݙیوݨ تے اتفاق تھیا۔عراقی وزیر داخلہ پاکستان ولوں زائرین دے گروپاں کوں باقاعدہ منظم اَتے ریگولیٹ کرݨ دے اقدامات دی بھرپور تعریف کیتی۔ عراقی وزیر داخلہ پاکستانی ہم منصب محسن نقوی نال ڳالھ مہاڑ کریندے آکھیا جو تہاݙے دور اچ پہلی واری زائرین گروپاں کوں منظم کرݨ کیتے مؤثر اقدامات کیتے ڳئن جیڑھے قابل تحسین ہن۔ عراقی وزیر داخلہ یقین ݙیوایا جو پاکستانی وزارت داخلہ ولوں ݙتی ڳئی فہرست وچ شامل سارے زائرین کوں عراق آوݨ دی اجازت ہوسی۔وفاقی وزیر داخلہ محسن نقوی واضح کیتا جو عراق ونڄݨ آلے زائرین کوں مقررہ مدت توں ودھ قیام دی اصلوں اجازت نہ ہوسی اَتے ایں حوالے نال ݙوہیں ملکاں دے متعلقہ ادارے نیڑے دے رابطے وچ رہسن۔ وزیرداخلہ محسن نقوی عراقی حکومت اَتے عوام دا زائرین کیتے بھرپور تعاون اَتے روایتی میزبانی تے شکریہ ادا کریندے آکھیا جو پاکستانی زائرین دی سلامتی، عزت اَتے سہولت حکومت پاکستان دی پہلی ترجیح اے۔عراقی وزیر داخلہ ایں موقع تے ݙسایا جو او وقتی پاکستان دا دورہ کریسن تاں جو زائرین دی سہولت، سکیورٹی تعاون اَتے ݙو طرفہ رابطیں کوں مزید مضبوط بݨاوݨ کیتے آندے ویلھے دا سانجھا لائحہ عمل طے کیتا ونڄ سڳے۔ ݙوہیں وزرائے داخلہ سکیورٹی تعاون، انسداد دہشت گردی اَتے انسانی سمگلنگ دی روکݨ کیتے معلومات دے تبادلے اَتے سانجھے میکنزم کوں مزید مضبوط بݨاوݨ تے وی اتفاق کیتا
