پاکستان اَتے برطانیہ وچال ترقیاتی مذاکرات دا نواں دور، تجارت، سرمایہ کاری، ماحولیات اَتے سماجی شعبیں وچ تعاون مزید ودھاوݨ تے اتفاق

اسلام آباد۔ 12 دسمبر(اے پی پی) پاکستان اَتے برطانیہ وچال اٹھ سال بعد ترقیاتی مذاکرات دا نواں دور اسلام آباد اچ شروع تھی ڳئے جیں وچ ݙوہیں ملکاں تجارت، سرمایہ کاری، ماحولیات اَتے سماجی شعبیں وچ تعاون مزید ودھاوݨ تے اتفاق کیتا۔ اعلیٰ سطح مذاکرات وچ اہم اقتصادی اَتے ترقیاتی امور تے پیشرفت سامݨے آئی جیڑھی پاکستان دی معاشی بحالی اَتے عالمی اعتماد دے ودھارے دی علامت قرار ݙتی ویندی پئی اے۔مذاکرات دے دوران وفاقی وزیرخزانہ محمد اورنگزیب اَتے برطانوی وزیر ترقیاتی امور بیرونیس چیپ مین وچال تفصیلی ملاقات تھئی۔ ݙوہیں رہنماواں ایس آئی ایف سی دیاں کوششاں دی تعریف کریندے آکھیا جو ایں فورم دے ذریعے پاکستان اَتے برطانیہ وچال معاشی تعاون وچ نمایاں بہتری آئی اے۔ وزیر خزانہ ݙسایا جو پاکستان وچ 200 توں ودھ برطانوی کمپنیاں کم کریندیاں پئن جیں نال ݙو طرفہ تجارت دا حجم 5.5بلین پاؤنڈ توں ودھ چُکیے۔ انہاں آکھیا جو سرمایہ کاری وچ مسلسل ودھارا عالمی سطح تے پاکستان تے ودھدے اعتماد دا ثبوت اے۔مذاکرات دے دوران صحت، تعلیم، آبادی اَتے ماحولیاتی استحکام دے شعبیں وچ سانجھی سرمایہ کاری دے امکانات تے وی ڳالھ مہاڑ کیتی جݙاں جو ماحولیات اَتے قدرتی وسیلیں دے مؤثر استعمال کیتے’’گرین کومپیکٹ پروگرام‘‘ دا باضابطہ آغاز کیتا ڳئے جیڑھا گرین ٹیکنالوجیز وچ تعاون کوں مزید وسعت ݙیسی۔ بیرونیس چیپ مین اَتے وزیرتعلیم خالد مقبول صدیقی ’’پاک-یو کے ایجوکیشن گیٹ وے‘‘ دے آندے مرحلے دا افتتاح وی کیتا جیں دے تحت سٹارٹ اپ فنڈز، آن لائن لرننگ پروگرامز اَتے تعلیمی موقع وچ ودھارا شامل اے۔ ایں اقدام نال ݙوہیں ملکاں دے تعلیمی اداریں وچال سانجھے داری مزید مضبوط تھیسی۔ماہرین موجب اہم ترقیاتی پیشرفت نہ صرف پاکستان دی معیشت وچ استحکام گھن آسی بلکہ غیر ملکی سرمایہ کاری دے نویں رستے وی کھولیسی جیں نال مستقبل وچ پاکستان اَتے برطانیہ دے تعلقات مزید تکڑے تھیسن