فیلڈ مارشل سید عاصم منیر دا گوجرانوالہ اَتے سیالکوٹ گیریژن دا دورہ

راولپنڈی۔ 13 دسمبر (اے پی پی) چیف آف آرمی سٹاف اَتے چیف آف ڈیفنس فورسز سید عاصم منیر آکھیے جو مسلح افواج پاکستان اندرلے اَتے ٻاہرلے چیلنجز، جنہاں وچ دشمن دیاں ہائبرڈ مہمات، انتہا پسند نظریات اَتے قومی استحکام کوں گھٹزور کرݨ دی کوشش اَتے تقسیم کرݨ آلے عناصر شامل ہن، تے پورا توجہ ݙتی ہوئی اے۔ جدید جنگ چستی، درستگی، حالات دی بھرپور آگاہی اَتے وقتی فیصلہ سازی دا تقاضا کریندی اے۔ آئی ایس پی آر توں جاری پریس ریلیز موجب فیلڈ مارشل سید عاصم منیر (نشان امتیاز ملٹری، ایچ جے، چیف آف آرمی سٹاف اَتے چیف آف ڈیفنس فورسز) گوجرانوالہ اَتے سیالکوٹ گیریژن دا دورہ کیتا۔ آوݨ تے انہاں کوں فارمیشن دی آپریشنل تیاری اَتے جنگی صلاحیت کوں مضبوط بݨاوݨ کیتے اہم اقدامات تے بریفنگ ݙتی ڳئی۔ فیلڈ مارشل فیلڈ تربیتی مشقاں اَتے ایڈوانسݙ سمیولیٹر ٹریننگ سہولت دا مشاہدہ کیتا اَتے فارمیشن دے اعلیٰ پیشہ ورانہ معیاراں اَتے مجموعی تیاری دی تعریف کیتی۔ٹیکنالوجیکل موافقت دی اہمیت تے زور ݙیندے انہاں آکھیا جو جدید جنگ چستی، درستگی اَتے حالات دی بھرپور آگاہی اَتے وقتی فیصلہ سازی دا تقاضا کریندی اے۔ افسراں اَتے سپاہیاں نال ڳالھ مہاڑ دے دوران چیف آف آرمی سٹاف اَتے چیف آف ڈی فینس فورسز انہاں دے اُچے حوصلے اَتے قومی سلامتی کیتے پکے عزم دی تعریف کیتی جݙاں جو سخت اَتے مشن تے مبنی تربیت دی اہمیت تے زور ݙِتا۔ انہاں تاکید کیتی جو پاکستان آرمی اندرلے اَتے ٻاہرلے چیلنجز، بشمول دشمن دیاں ہائبرڈ مہمات، انتہا پسند نظریات اَتے قومی استحکام کوں گھٹزور کرݨ دی کوشش اَتے تقسیم کرݨ آلے عناصر تے پورا توجہ رکھی ہوئی اے۔