انصاف وقتی ݙیوݨ ، ڈیجیٹل عدلیہ اَتے عوامی اعتماد اساݙی ترجیح اے، چیف جسٹس سپریم کورٹ

اسلام آباد۔ 13 دسمبر (اے پی پی) چیف جسٹس آف پاکستان جسٹس یحییٰ آفریدی آکھیے جو عدالتی نظام دی مضبوطی، انصاف تئیں تکھی رفتار رسائی اَتے عوامی اعتماد دا ودھارا اساݙی پہلی ترجیح ہن۔ انہاں زور ݙِتا جو جدید ٹیکنالوجی، مؤثر پالیسی سازی اَتے ادارہ جاتی ہم آہنگی دے ذریعے مقدمیں دے وقتی فیصلے کوں یقینی بݨایا ویسی۔سپریم کورٹ دے شعبہ تعلقات عامہ دے جاری اعلامیہ موجب اے ڳالھ انہاں سپریم کورٹ آف پاکستان وچ نیشنل جوڈیشل (پالیسی میکنگ) کمیٹی دے 56ویں اجلاس دی صدارت کریندے آکھی ۔ اجلاس وچ سارے ہائی کورٹس دے چیف جسٹس اَتے چیف جسٹس فیڈرل آئینی عدالتِ پاکستان جسٹس امین الدین خان شریک تھئے، جنہاں اہم فیصلے کیتے۔کمیٹی متفقہ طور تے اہم فیصلے کیتے جنہاں وچ جبری گمشدگیاں دے مقدمیں تے حکومتی اقدامات دی تعریف کریندے ، اٹارنی جنرل پاکستان آندے اجلاس وچ زیرِ حراست لوکاں کوں 24گھنٹے دے اندر مجسٹریٹ دے سامݨے پیش نہ کیتے ونڄݨ دیاں شکایتاں دے ازالے کیتے جامع طریقہ کار پیش کریسن۔تجارتی، ریونیو اَتے مالیاتی مقدمیں وچ تاخیر دے خاتمے کیتے ذیلی کمیٹی دیاں سفارشاں منظور کرڳھدیاں ڳئیاں۔ہائی کورٹس دی گزریل سہ ماہی وچ مقررہ مدت دے اندر5 لکھ 58ہزار474مقدمے نبیڑݨ تے کارکردگی دی تعریف کیتی ڳئی، جیں وچ لاہور ہائی کورٹ دی کارکردگی نمایاں ہائی۔سارے ضلعی عدالتاں وچ ای فائلنگ دے فوری آغاز دی منظوری ݙتی ڳئی۔عدالتی کمپلیکسز وچ ون ونڈو فیملی اَتے تریمت سہولت مراکز دے قیام دی اصولی منظوری ݙتی ڳئی۔چیف جسٹس یحییٰ آفریدی ایں عزم دا اعادہ کیتا جو عدلیہ جدید تقاضیں نال ہم آہنگ تھی تے عوام کوں وقتی اَتے معیاری انصاف ݙیسی، اَتے ادارہ جاتی اصلاحات دے ذریعے عوامی اعتماد کوں مزید مضبوط بݨایا ویسی۔