پاکستانی معیشت وچ استحکام پائیدار ترقی آلے پاسے چنڳاں قدم اے، بزنس کمیونٹی دی مدد نال ملک کوں معاشی طور تے اڳوں گھن ویسوں، وزیر خزانہ محمد اورنگزیب

لاہور۔ 13 دسمبر(اے پی پی) وفاقی وزیر خزانہ سینیٹر محمد اورنگزیب آکھیے جو وزیراعظم محمد شہباز شریف دی قیادت وچ پاکستانی معیشت وچ استحکام پائیدار ترقی آلے پاسے ھک چنڳاں قدم اے، حکومت دے اصلاحاتی اقدامات پاروں مقامی صنعتاں کوں ودھارا ملیے جیں نال پیداواری شعبے وچ بحالی دا عمل تکھا تھیا اَتے معاشی اشاریں وچ وی نمایاں بہتری آئی۔ بزنس کمیونٹی دی مدد نال ملک کوں معاشی طور تے اڳوں گھن ویسوں۔اے ڳالھ انہاں مقامی ہوٹل وچ لاہور چیمبر دے زیر اہتمام منعقدہ آل پاکستان چیمبرز کانفرنس توں خطاب کریندے آکھی۔وفاقی وزیر خزانہ آکھیا جو خود کار نظام نال ٹیکس وصولی وچ شفافیت آئی اے، ٹیکس ݙیوݨ آلے کوں سہولت ݙیوݨ نال انہاں دا حکومت تے اعتماد ودھیے۔ انہاں آکھیا جو ٹیکس نظام وچ شفافیت کیتے این ایف سی ایوارڈ تے گزریل ہفتے تھیوݨ آلے اجلاس وچ چارے صوبیں دے وزرائے اعلیٰ و خزانہ شرکت کیتی، اَتے صوبیں دی مشاورت نال اڳوں ودھݨ تے اتفاق کیتا ڳیا۔انہاں آکھیا جو اداریں وچ حکومتی مداخلت گھٹ کریندے پیوں ۔ انہاں آکھیا جو پرائیویٹ سیکٹر ہی ملکی معیشت کوں لیڈ کرݨا اے اَتے آئی ٹی سیکٹر ٻہوں چنڳا پرفارم کریندا پئے۔ انہاں آکھیا جو ٹیکسٹائل سودھے باقی شعبے وی برآمدات دے ودھارے وچ آپݨا کردار ادا کرن، اَتے اڄوکے سال ترسیلات زر43ارب ڈالر توں ودھ تھیوݨ دا امکان اے۔ انہاں آکھیا جو وݙے صنعت کار اڳوں نہ آسن تاں ٻاہرلی سرمایہ کاری ملک وچ نہ آسی۔وفاقی وزیرآکھیا جو بی آئی ایس پی دے بجٹ وچ 27فیصد ودھارا کیتا ڳئے۔ انہاں آکھیا جو24ایس او ایز کوں پرائیویٹائزیشن کمیشن دے حوالے کر ݙتا ڳئے، اَتے تاجراں توں آکھیا جو پرائیویٹائزیشن دے حوالے نال حکومت نال تعاون کرن۔ وفاقی وزیر آکھیا جو حکومت بزنس کمیونٹی دے مسلیں دے حل کیتے حاضر اے۔ محمد اورنگزیب آکھیا جو مہانگ گھٹدی پئی اے تاں پالیسی ریٹ وچ مزید کمی تھیسی، بزنس کمیونٹی دی مدد نال ملک کوں معاشی طور تے اڳوں گھن ویسوں اَتے ٹیرف رجیم دا وی وقتی اعلان کیتا ویسی۔وفاقی وزیر خزانہ آکھیا جو کراچی چیمبر دی طرح لاہور چیمبر وچ وی ریسرچ سیل بݨݨا چاہیدے، تاجراں کوں ملکی معیشت کوں سہارا ݙیوݨ کیتے حکومت دا پورا ساتھ ݙیوݨا چاہیدے۔ محمد اورنگزیب آکھیا جو نوجوان کاروباری لوکاں کیتے چنڳاں ماحول حکومت دی ترجیح اے جیں نال نِکیاں اَتے درمیانی صنعتاں وچ روزگار دے نویں موقع پیدا تھیسن۔ انہاں آکھیا جو ڈیجیٹل معیشت اَتے ای کامرس نال کاروباری سرگرمیاں وچ وسعت آئی جݙاں جو برآمدی صنعتاں وچ بہتری نال زرمبادلہ وچ وی ودھارا تھیے۔وفاقی وزیر خزانہ آکھیا جو حکومت دے اصلاحاتی اقدامات دے نتیجے وچ مقامی صنعتاں کوں ودھارا ملیے، جیں نال پیداواری شعبے وچ بحالی دا عمل تکھا تھیا اَتے معاشی اشاریں وچ وی نمایاں بہتری آئی اے۔ انہاں آکھیا جو سرمایہ کاراں اَتے تاجراں دا حکومت دی تاجر دوست پالیسیاں تے اعتماد بحال تھیوݨ نال ہی کاروبار کوں ودھارا ملیا اَتے معیشت تکڑی تھئی اے۔